Уус Ньараҕа Арассыыйа күнүн ыһыаҕынан бэлиэтиэхтэрэ

Бэс ыйын 12 күнүгэр Өймөкөөн улууһун киинигэр Арассыыйа күнүн чэрчитинэн, Уус Ньара устуоруйатыгар аан бастаан ыытыллар Ыһыахха, араас омук дьоно бэйэлэрин национальнай астарын амсатыахтара.

Тэрийэр кэмитиэт чилиэнэ Любовь Иванова ыһыахха бэлэмнэнии туһунан маннык кэпсээтэ:

– Улуус киинэ төрүттэниэҕиттэн манна араас омук тоҕуоруһан, биир эйэлээх дьиэ кэргэн курдук олорор. Буолаары турар ыһыахха национальнай диаспоралар бэйэлэрин култуураларын, үгэстэрин көрдөрөр араас астары бэлэмнии сылдьаллар. Манна кэлбит улуус киинин олохтоохторо уонна ыалдьыттара үгэс буолбут нуучча блинытыттан саҕалаан, узбек пловугар, бүрээт буузатыгар тиийэ  минньигэс амтаны амсайахтара. Уус Ньараҕа олорор араас омук дьоно олус түмсүүлээхтэр, бэйэлэрин тылларыгар, үгэстэригэр, култуураларыгар ураты харыстабыллаах, ытыктабыллаах сыһыаннаахтар. Ону улууспут киинигэр аан бастаан ыытыллар ыһыах бигэргэтиэҕэ. Ол курдук, молдаван омук чаҕылхай бэрэстэбиитэлэ, улуус олохтоохторугар минньигэс астааҕынан аатырар “У Петровны” кафе салайааччыта Надежда Слепухина молдова куукунатын билиһиннэриэҕэ. Эльвира Цибиктарова салайааччылаах бүрээт диаспората эттэн, балыктан, үүттэн, сир аһыттан оҥоһуллар астарын амсатыаҕа. Буузы (позы), бухлер, уонна да атын астары амсайан, ыһыах ыалдьыттара астыныахтара. Уус Ньара олохтоохторо олус сөбүлүүр, армян омук аатырбыт шашлыгын,  үгэс быһыытынан, Анушван Меликсетян астаары оҥосто сылдьар. Эбээн норуотун минньигэс аһын  ытыктабыллаах Мария Громова улахан дьиэ кэргэнэ бэлэмнии сылдьар. Кыргызтар национальнай куукуналарыгар бурдуктан оҥоһуллубут национальнай астара үгүс: чоймо токоч – хобуораска  майгынныыр бэчиэнньэ; жупка — итии үүккэ суурайан баран, иэдьэгэйи уонна арыыны кытта оҥоһуллубут “слоенай” дэнэр тиэстэ минньигэс аһа уо.д.а. Ыһыахха кэлбит дьону бу минньигэс астарынан Насикат Садыкова күндүлүөҕэ. Нуучча омук диаспоратын чаҕылхай бэрэстэбиитэлэ Анна Богатина аатырбыт блинытын амсайбыт дьон бу бырааһынньыгы өргө диэри саныы сылдьыахтара. Уонна, биллэн турар, асчыттарынан биллэр саха диаспоратын бэрэстэбиитэллэрэ Алена Андросова эдьиийин Елена Кондакованы кытта  саха аһын астаан ыалдьыттары күндүлүөхтэрэ. Бу маннык баай астаах-үөллээх бырааһынньык дьон өйүгэр-санаатыгар умунуллубат өйдөбүлү хаалларыа диэн эрэнэбит. Кэлиҥ, сылдьыҥ — барыгытын аһатыахпыт!