Уус Ньараҕа атаҕын тоһуппут дьахтарга 100 тыһ. солк. төлөөтүлэр

Өймөкөөн оройуонун борокуратуурата Уус Ньара бөһүөлэгэр дьахтар атаҕын тоһутан балыыһаҕа киирбит чахчытынан бэрэбиэркэ ыытта, диэн СӨ Борокуратууратын пресс-сулууспата иһитиннэрэр.

Силиэстийэ быһаарбытынан, эмсэҕэлээбит дьахтары ааһан иһэр бэйдиэ сылдьар ыт түҥнэри көтөн охторбут. Охтубут дьахтар түмүгэр уҥа атаҕын уҥуоҕун тоһуппут. Бу быһылаан муниципалитеттар бэйдиэ сылдьар ыттары дьаһайыыга федеральнай сокуон ирдэбиллэрин толорууга сөптөөх миэрэлэри ылбатахтарын түмүгэр тахсыбыта быһаарылынна.

Оройуоннааҕы борокуратуура эмсэҕэлээбит дьахтар интэриэһин көмүскээн, Уус Ньара дьаһалтатыттан 100 000 солк. суумалаах материальнай хоромньуну толуйарыгар суукка үҥсүбүт.  Борокуруор ирдэбилин суут ылынна. Бөһүөлэк дьаһалтата эмсэҕэлээбит дьахтар баанын  счетугар хоромньу уопсай сууматын түһэрдэ. Суут уурааҕа толорулунна.