Уус Ньараҕа бырамыысыланнас идэлэрин кылаастара арыллыахтара

Бу күннэргэ Өймөкөөн улууһун баһылыга Александр Оконешников уонна улуустааҕы үөрэх управлениетын салайааччыта Константин Тимофеев СӨ Үөрэҕин миниистирэ Нюргуна Соколованы кытта көрүстүлэр.  

Өрүттэр үөрэхтээһиҥҥэ туһуламмыт кэккэ боппуруоһу дьүүллэстилэр. Онтон биир сүрүн боппуруос – улуус киинин оскуолаларыгар  бырамыысыланнай  идэлэргэ орто анал үөрэхтээһин тэрилтэтин тэрийии.

— Үөрэх миниистирин кытта Уус Ньара орто оскуолаларыгар хайа үлэтин уонна геология хайысхаларын үөрэтиигэ туһуламмыт анал кылаастары арыйар былааннаахпытын сүбэлэстибит. Үөрэх урукку ПТУ дьиэтигэр ыытыллыаҕа. Улуус баһылыга Александр Оконешников «Западнай» уонна «ПоискЗолото» көмүс хостуур хампаанньалар салайааччыларын кытта социальнай бииргэ үлэлээһин туһунан кэпсэтиилэри ыыппытын түмүгэр, көмүсчүттэр дьиэ өрөмүөнүгэр көмөлөһүөхтэрэ. Бу кэскиллээх бырайыагы олоххо киллэриигэ оройуоҥҥа үлэлиир атын көмүс хостуур тэрилтэлэри эмиэ кытыннарыахпыт. Былаан быһыытынан сир баайын хостооһуҥҥа сыһыаннаах араас идэлэргэ үөрэтии (профориентация) оскуола саастаах оҕолорго эрэ буолбакка, үлэһит ыччаты эмиэ хабар былааннаахпыт, — диэн бэлиэтээтэ улуустааҕы үөрэх управлениетын салайааччыта Константин Тимофеев.

Онон сотору кэминэн Уус Ньараҕа орто анал үөрэх тэрилтэтин арыйан, хайа үлэтин уонна геология исписэлиистэрин улууска бэйэтигэр бэлэмнээн таһаарыахтара.