Уус Ньараҕа сааламмыт киһини туттулар

Бэҕэһээ, алтынньы 27 күнүгэр, ИДьМ Өймөкөөннөөҕү отделын дьуһуурунай чааһыгар 03:45 ч. Уус Ньара бөһүөлэгэр «Хороший» маҕаһыын аттыгар эр киһи саанан дьону куттуу сылдьарын туһунан иһитиннэрии киирбит.

Ыйыллыбыт аадырыска тута полиция үлэһиттэрэ тиийбиттэр. Онно  сааламмыт эр киһини икки киһи полиция үлэһиттэригэр туттарбыттар. Киниттэн ботуруоннара суох «Тигр» сааны былдьаабыттар диэн ИДьМ Саха сиринээҕи салаатын пресс-сулууспата иһитиннэрэр.

Билиҥҥитэ кинини Силиэстийэлиир кэмитиэт территориальнай отделениетыгар илдьибиттэр.

Арассыыйа ИДьМ Өймөкөөннөөҕү отдела ол түүн түбэһэ кэлэн сааламмыт киһини туппут уонна саатын былдьаабыт дьону бириэмийэлиир туһунан быһаарыы ылынна.