Уус Ньараҕа сөмөлүөт көтүүтэ сөргүтүллүөҕэ

Атырдьах ыйын 5 күнүттэн «Якутия» авиахампаанньа Уус Ньара аэропордун үлэтин тохтоппута.

Төрүөтэ – көтөр-түһэр балаһа үлэтэ ирдэбилгэ эппиэттээбэт буолуута. Сөмөлүөт көтүүтүн тохтотуу дьон олоҕор куттал суоһаабатын туһугар туһуламмыта. Аэродромҥа өрөмүөн үлэтэ саҕаламмыта эрээри, олохтоохторго сөмөлүөт көтүүтэ хаһан сөргүтүллэрин туһунан  сүүрбэччэ күн устата туох да иһитиннэрии суоҕа. Биллэн турар, маннык түбэлтэҕэ араас сурах-садьык тарҕанар, тыҥааһыннаах балаһыанньа үөскүүр.

«Уус Ньара аэропорда» ГУП салайааччытын э.т. Алексей Вылегжанинтан оройуон киинигэр  сөмөлүөт хаһан сылдьыан сөбүн туһунан туоһуластыбыт.

— Бу күннэргэ Уус Ньара аэропордун саҥардыбыт бэдэрээтчит «Альянс-2005» ААУо салалтата анал хамыыһыйа ирдэбилин толорон, өрөмүөн үлэтин ыытта. Аэродромтан бөдөҥ бөҕү-сыыһы ыраастаата. Маны таһынан, бэдэрээтчит сүрүн тахсар-киирэр суолга икки  массыына туруорар сиргэ анал бэлиэлэри эбии оҥордо. Онон «Уус Ньара аэропорда» ГУП AН-24, 26 уонна Bombardier Q300 «Якутия» авиахампаанньа сөмөлүөттэрин көрсөргө уонна атаарарга бэлэм, — диэн бэлиэтээтэ Алексей Вылегжанин.

«Якутия» авиахампаанньа пресс-сулууспатыттан Уус Ньараҕа сөмөлүөт хаһан көтөрүн туһунан ыйытыыга “2025 сыл балаҕан ыйын 2 күнүттэн  көтүөхтээх сөмөлүөт кыраапыга былааҥҥа киирдэ. Уус Ньараҕа көтөр авиабилиэт сыанатын «Якутия» авиахампаанньа официальнай саайтыттан билсиэххэ  сөп” диэн хоруйдаатылар.

Биллэн турар, күһүҥҥү кэмҥэ уоппуска бүтүүтэ тустаах сонуну кэмигэр тиэрдибэккэ, дьон ыксыыр, уолуйар, айманар түгэнэ үгүс. Онон улуус  олохтоохторо кэлиилэрин-барыыларын ордук былааннанар кэмнэригэр араас уларыйыылары тустаах салайааччылар кэмиттэн кэмигэр иһитиннэрэн иһэллэрэ наада. Соторутааҕыта Уус Ньара аэродромугар улахан саҥардар үлэни ыыппыт бэдэрээччит «Альянс-2005» ААУо хамыыһыйа ирдэбилигэр ыйыллыбыт итэҕэһи көннөрөн, өрөмүөнү хаачыстыбалаахтык оҥорбутугар эрэнэбит. Өймөкөөн улууһун олохтоохторо Уус Ньараҕа көтүөхтээх сөмөлүөттэр сырыылара сөргүтүллэрин хаһааҥҥытааҕар да кэтэһэллэр. Бу күннэргэ уһун ардахтар «Өймөкөөн» өрөспүүбүлүкэтээҕи айан суолун муосталарын, суолларын сууйан, «Халыма» федеральнай суол үгүс учаастактарын эмиэ туһаттан таһаарда. Онон үөрэхтэригэр кэлиэхтээх устудьуоннар, оскуолаҕа киириэхтээх оҕолоох дьон, балыыһаттан тахсыбыт кыра оҕолоох ыаллар өр хаайтарбат туһуттан кэмиттэн кэмигэр сөптөөх иһитиннэриигэ хаһааҥҥытааҕар да наадыйаллар.