Уус Ньараҕа ыкка ытыттарбыт оҕолорго 100 тыһыынчаны төлүөхтэрэ

2022  сыл сайыныгар Өймөкөөн улууһун Уус Ньара бөһүөлэгэр 2007 уонна 2009 сыллаах төрүөх  кыргыттар ыкка ытыттаран улуустааҕы киин балыыһаҕа көрдөрбүттэр.  Кыргыттар илиилэрин, бууттарын ытыттаран балыыһаҕа эмтэммиттэр.

Оҕолор ыттан эмсэҕэлээбит дьыалаларынан Өймөкөөн улууһун борокуратуурата бэрэбиэркэ оҥорбут. Бэрэбиэркэ түмүгүнэн, бэйдиэ ыттары тутууга бөһүөлэк дьаһалтата  сокуоҥҥа ирдэбили кэһэн оҕолор эмсэҕэлээбиттэрин быһаарбыт.  Онон улуус борокуратуурата суукка  бөһүөлэк дьаһалтатыттан эмсэҕэлээбит икки кыыска 50-нуу тыһыынча солкуобай төлөбүрү төлүүр туһунан ирдэбил түһэрбит. Борокуратуура ирдэбилин суут ылыммыт.  Онон Уус Ньара  дьаһалтата оҕолорго 100 тыһыынча солкуобайы төлүөхтээх.