Уус-уран тылбааска Савва Тарасов аатынан бириэмийэ олохтонуоҕа

Муус устар 25 күнүгэр Литература түмэлигэр саха норуодунай бэйиэтэ, тылбаасчыт, суруналыыс, РФ култууратын үтүөлээх үлэһитэ, П.А. Ойуунускай аатынан Судаарыстыбаннай бириэмийэ лауреата Савва Иванович Тарасов төрөөбүтэ 90 сылынан ахтыы киэһэтэ буолан ааста. Кини 1993-1998 сылларга Саха сирин Суруйааччыларын сойууһун салайбыта.

Бу дьоро күҥҥэ бэйиэт аймахтара,  Горнай улууһун уонна Солоҕон нэһилиэгин дьоно-сэргэтэ, Саха сирин Суруйааччыларын сойууһун чилиэннэрэ, Саха тыйаатырын артыыстара, Олоҥхо Ассоциациятын бэрэстэбиитэллэрэ кытыннылар.

Горнай улууһун баһылыга Никита Андреев саха тылын эйгэтин кэҥэппит ытыктыыр биир дойдулаахтарын аатын үйэтитэргэ үлэлэрин билиһиннэрдэ. Никита Викторович быйылгы сылтан Горнай улууһун дьаһалтата Савва Тарасов аатынан уус-уран тылбааска анал бириэмийэни олохтуурун биллэрдэ. Ол эбэтэр,  бу бириэмийэни быйыл «Чолбон» сурунаалга бэчээттэммит бастыҥ тылбаас ааптара тутуоҕа.

Ону тэҥэ, норуот бэйиэтигэр аналлаах түмэл тэрийэргэ үлэлэһэ сылдьалларын иһитиннэрэн, мустубут дьону үөртэ. Горнай улууһун дьаһалтата литератураҕа уонна духуобунаска тиһигин быспакка болҕомто уураллара, Суруйааччы сойууһун кытта бииргэ үлэлэһэллэрэ хайҕаллаах.

Савва Тарасов Өрөспүүбүлүкэ өрөгөйүн ырыатын тылын айбыт өлбөөдүйбэт өҥөлөөх. Кини  олоҥхо аан дойдуга ааттаныытыгар быһаччы кыттыгастааҕа – Олоҥхо Ассоциациятын салайбыта. Ону тэҥэ, Шекспиры уонна Еврипиды сахалыы саҥардан, П.А. Ойуунускай аатынан Саха академиялыы тыйаатырын үрдүкү кэрдиискэ тахсарыгар олук уурсубута.