Уустар түһүлгэлэрэ аһылынна

Нерюнгрига Олоҥхо ыһыаҕа ыытылла турар, саҥа тутуллубут  «Амикан» этнокомплекска Уустар түһүлгэлэрин аһыллыыта буолла.

Бырабыыталыстыба бэрэссэдээтэлин солбуйааччы Сергей Местников үөрүүлээх аһыллыыга кыттыыны ылла:
— Олоҥхо ыһыаҕар Уустар түһүлгэлэрин аһыллыыта үгэскэ кубулуйда. Саха култууратыгар уус идэтэ былыр-былыргыттан үрдүктүк тутуллара.
Бүгүн маннык үтүөкэн сиргэ үтүө тэрээһини үөрэ көрсөбүт. Тимир болгуону уулларыы дьайыытын илэ чахчы көрүөхпүт. Бу үгэс уларыйбакка кэллэ. Киэһэ Ил Дархан Айсен Николаев кэлэн, үгэс буолбут тэрээһиҥҥэ, тимири уһаарыыга кыттыһыаҕа. Нерюнгри оройуонун олохтоохторугар сүрдээх эйэҕэстик көрсүбүккүтүгэр махталбын тиэрдэбин, — диэн эттэ.
Үөрүүлээх тэрээһин оһуохайынан түмүктэннэ. Халлаан халлан, күн тыган, Далбар Хотуттар симэхтэрэ күлүмүрдээн, дьиҥ чахчы ыһыах тыына билиннэ. Быйылгы Олоҥхо ыһыаҕар бастакы оһуохай дуорайда, саха, нуучча, эбэҥки илии илиилэртэн ылсан, күнү уруйдуур үҥкүүгэ эргийдилэр.