V өрөспүүбүлүкэтээҕи «Yлэ, иис күрэһэ» саҕаланна

Бүгүн үс күннээх V өрөспүүбүлүкэтээҕи «Yлэ, иис күрэҕэ» иистэнньэҥ ийэлэр уонна волонтердар күрэстэрэ, «Кыайыы 50 сыла» успуорт дыбарыаһыгар үөрүүлээх быһыыга-майгыга аһылынна.

Күрэс аһыллыытын тэрээһинин саҕаланыытыгар ийэ дойдуларын көмүскүү сылдьан сырдык тыыннарын толук уурбут буойуттары кэриэстээн тохтобул мүнүүтэтигэр турдулар. Салгыы үөрүүлээх аһыллытыгар СӨ Баһылыгын уонна Бырабыыталыстыбатын дьаһалтатын салайааччыта Георгий Михайлов өрөспүүбүлүкэ салалтатын аатыттан анал байыаннай дьайыыга көмөлөһөр министиэристибэлэргэ, биэдэмэстибэлэргэ, волонтердарга уонна илиилэрин сылааһынан угуттаан таҥас-сап тигэр иистэнньэҥнэргэ барҕа махталын биллэрдэ.

«Сахабыт сирин бары улуустарыгар анал байыаннай дьайыыга сылдьар уолаттарбытыгар анаан таҥас-сап тигэ, өрүү көмөлөһө сылдьар иистэнньэҥнэрбитигэр махталбын тиэрдэбин! Бастаан 2022 с. Ирина Егоровна Саввинаны кытары билсэн бараммын, биир-икки иистэнэр массыыналаах этилэр. Билигин Бырабыыталыстыба көмөлөһөн, туспа иистэнэр сыахтанан, кэҥээн ньир-бааччы үлэлии олороллор. Элбэх уол биһиги илиилэрин сылааһынан тикпит таҥастара, харысхаллара биһигини харыстыы, араҥаччылыы сылдьар дииллэр. Эһиги илиигит сылааһынан бигээбит оҥоһуктаргыт биһиги хорсун буойуттарыбытын өрүү харыстыы сырыттын!» — диэн эттэ Георгий Михайлов.

«Өрөспүүбүлүкэ аатыттан истиҥник эҕэрдэлиибин! Бүгүҥҥү тэрээһин аҥардас күрэс эрэ буолбатах, бу биһиги түмсүүлээхпитин, Кыайыыга эрэллээхпитин көрдөрөр тэрээһин буолар. Биһиги эдьиийдэрбит, ийэлэрбит, эбээлэрбит, эһиги бэйэҕит бириэмэҕитин аахсыбакка, үтүө дьыалаҕытынан күннэри-түүннэри тыылга кыайыыны уһансаҕыт. Эһиги ахсаабат кыһамньыгыт, үтүө санааҕыт иһин, үрдүк ааккытыгар сүгүрүйэбин!», — диэтэ СӨ Бырабыыталыстыбатын Бэрэссэдээтэлин бастакы солбуйааччыта Дмитрий Садовников.

Салгыы гражданскай оборуона, нэһилиэнньэ олоҕун куттала суох буолуутун миниистирэ Дмитрий Лепчиков: «СӨ Гражданскай оборуона уонна нэһилиэнньэ олоҕун куттала суох буолуутун министиэристибэтин аатыттан анал байыаннай дьайыыга көмөлөһө сылдьар бары министиэристибэлэргэ, биэдэмэстибэлэргэ, биирдиилээн тэрилтэлэргэ, волонтердарга уонна иистэнньэҥ ийэлэрбитигэр, эдьиийдэрбитигэр истиҥник махтанабын! Тус олоххутугар дьолу, чэгиэн туругу, ситиһиини баҕарабын! Бары бииргэ – кыайыыга!», — диэн тыл эттэ.

«Үлэ, иис күрэҕэ» байыаннай таҥаһы тигэр иистэнньэҥнэр өрөспүүбүлүкэтээҕи күрэстэрин тэрийээччи, экспертнэй хамыыһыйа бэрэссэдээтэлэ Ирина Саввина күрэс аһыллыытыгар иистэнньэҥ далбар хотуттарга махталын биллэрдэ:

«Бүгүн биһиэхэ күүс-көмө буолар, далбар хотуттар уонна салайааччылар муһуннулар. Күрэскэ быйыл 11 хамаанда кэллэ, кинилэр үгүстэрэ, бу икки сыл устата ахсаабат көмөнү оҥорон кэллилэр. Онон сүһүөхтээх бэйэм сүгүрүйэн тураммын, махталбын этэбин. Анал байыаннай дьайыы саҕаланыаҕыттан үрдүкү салалта дьиэ-уот булан, кыһалҕабытын быһааран, олус улахан көмөнү оҥорон кэллэ. Норуот уонна былаас бииргэ буоллахтарына – бу ыарахан кэмнэри чэпчэкитик аһарыахпыт. Бары бииргэ түмүстэхпитинэ – кыайыахпыт!», — диэтэ Ирина Егоровна.

Тэрээһин үөрүүлээх чааһыгар бу сыллар усталарыгар бэйэлэрин бириэмэлэрин кэрэйбэккэ, уолаттарбыт, кыайыы туһугар диэн байыаннай дьайыы кыттыылаахтарыгар таҥас-сап тигэр иистэнньэҥнэргэ Махтал суруктары уонна бэлэхтэри туттардылар.

Бу күрэс быйыл бэһис төгүлүн ыытыллар. Быйыл Саха сирин араас улуустарыттан уон биир хамаанда кэлэн, бэйэлэрин сатабылларын, маастарыстыбаларын көрдөрүөхтэрэ. Үс күн устата «Кыайыы 50 сыла» успуорт дыбарыаһыгар Дьокуускай куораттан, Чурапчы, Кэбээйи, Таатта, Мэҥэ Хаҥалас, Орто Халыма, Хаҥалас, Дьааҥы улуустарыттан хамаандалар кэлэн кытта сылдьаллар.

Санатан эттэххэ, былырыыҥҥы IV күрэс уопсай түмүгүнэн муҥутуур кыайыылааҕынан, Гран-при хаһаайынынан Кэбээйи улууһун хамаандата буолбута. Иккискэ – Чурапчы, үһүскэ – Мэҥэ Хаҥалас хамаандалара тахсыбыттара. Быйыл Кэбээйи улууһа Мукучу, Кэбээйи, Куокуй нэһилиэктэриттэн, үс хамаанданан кэлэн кытта сылдьарын бэлиэтиир тоҕоостоох.