V өрөспүүбүлүкэтээҕи «Yлэ, иис күрэстэрэ» түмүктэннэ

Түөрт күннээх истэнньэҥнэр ийэлэр уонна волонтердар V өрөспүүбүлүкэтээҕи «Yлэ, иис күрэстэрэ» түмүктэнэн, үөрүүлээх быһыыга-майгыга бастыҥнары чиэстээтилэр.

Дьиҥинэн ыллахха, манна хотторбут диэн суох, бары илии тутуурдаах бардылар, өйдөбүнньүк бэлэхтэри туттулар.

«Илии сылааһа» түмсүү тэрийбит бэһис күрэстэригэр өрөспүүбүлүкэ араас улууһуттан уон биир хамаанда кэлэн, бэйэлэрин сатабылларын, маастарыстыбаларын көрдөрдүлэр. Түөрт күн устата «Кыайыы 50 сыла» успуорт дыбарыаһыгар Дьокуускайтан, Чурапчыттан, Кэбээйиттэн, Мэҥэ Хаҥалас, Орто Халыматтан, Дьааҥыттан, о.д.а. улуустартан хамаандалар кытыннылар. Бэлиэтээн эттэххэ, быйылгы күрэскэ аҥардас Кэбээйи улууһуттан үс хамаанда кыттыбыта кэрэхсэбиллээх.

Бу күрэс түмүгүнэн муҥутуур кыайыылааҕынан, Гран-при хаһаайынынан Кэбээйи улууһун Мукучу хамаандата буолла. Санатар буоллахха, былырыын Кэбээйи, Мукучу, Куокуй сэлиэнньэлэриттэн хомуллан кыттыбыт хамаанда эмиэ бастаабыта. Бу сырыыга Чурапчы улууһуттан «Сатабыл» хамаандата былырыыҥҥы курдук, эмиэ иккис миэстэни ылла. Оттон үһүскэ Кэбээйи улууһун «Надежный тыл» түмсүү хамаандата ылан үөрүүтэ үрдээтэ. Былырыын үһүс буолбут Мэҥэ Хаҥалас улууһуттан «Хотун Төҥүлү» хамаандата быйыл төрдүһү ылла.

Бу «Үлэ, иис күрэҕэ» байыаннай таҥаһы тигэр иистэнньэҥнэр өрөспүүбүлүкэтээҕи күрэстэрин тэрийээччи, экспертнэй хамыыһыйа бэрэссэдээтэлэ Ирина Саввина күрэс хайдах ааспытын маннык кэпсиир: «Биһиги бу үс сыл устата анал байыаннай дьайыыга сылдьар 5000-н тахса уолу таҥыннардыбыт. Улуустарга филиаллары аһаммыт, үлэбит өссө кэҥээтэ. Бу күрэспит, анал байыаннай дьайыыга сылдьар уолаттарбытыгар таҥас тигэр дьоммутун сомоҕолуур, түмэр, өссө күүскэ көмөлөһөр сыаллаах ыытыллар. «Илии сылааһа» иис сыаҕа тэриллиэҕиттэн хаачыстыбалаах таҥаһы тигэр соруктаах. Үлэлэри сыаналыыр эспэрдэр, бастатан туран, таҥас ахсаанын буолбакка, хаачыстыбатын көрдүлэр. Хас күрэс аайы хамаандалар састааптара күүһүрэн, уопутуран иһэллэр. Быйылгы күрэскэ кэлбиттэр, бары да кэриэтэ биһиги филиалларбыт буолаллар. Онон хас биирдиилэрэ ханнык таҥас хайдах буоларын билэллэр, ол иһин тыҥааһыннаах буолла».