В.И. Комиссарова-Күлүмүрэ — икки тыллаах хоһоонньут, тылбаасчыт

Элбэх кинигэҕэ эрэдээктэрдээбит Владислав Доллонов: «Күлүмүрэ икки тылынан дэгиттэр суруйар хоһоонньут, тылбаас үлэтинэн дьаныһан дьарыктанар айар куттаах дьонтон биир бастыҥнара буолар. Айымньы ис хоһоонун, ааптар суруйар майгытын хайа кыалларынан толорутук биэрэр. Сахалыыта — сахалыы, нууччалыыта — нууччалыы тыыннаахтар, үрдүк таһымнаахтар,” — диэн бэлиэтээн этэр.

«Олох улам минньийэр» кинигэтигэр нарын намчы иэйиилээх, хомоҕой тыллаах хоһоонньут тапталлаах эбэтин Александра Ивановна Охлопкова кэриэһигэр айбыт «Эбээбэр» хоһооно олус долгутуулаах. Үгүс үлэни, сут, сэрии кыһалҕатын көрсүбүт, уон оҕотун көмпүт Ийэ барахсан олоҕун ойуулуур. Кыайыыны уһансан, соҕотох уолун үөрэхтээн, атаҕар туруоран, үс сиэнин бүөбэйдээн, сүрэҕин сылааһын анаабыт Эбээтин бүрэ дьүһүнүн, сырдык дууһатын ахтар суохтуур, сүрэҕэ айманар.

Сахалыы сайбайбыт таһаалаах,

Кып кылгас маадьаҕар атахтаах,

Ыарыыттан өлбөөрбүт харахтаах,

Үлэттэн бокоорбут тарбахтаах,

Эбээбин олус да ахтабын,

Суохтааммын ардыгар ытыыбын…

 

Күлүмүрэ «Саха ынаҕа» хоһоонун саха киһитэ дууһатынан-сүрэҕинэн ылынар.

Үүтэ хойуу, муоһа мукур –

Бээгэй саха ынаҕа.

Мааны майгы, улуу тулуур

Үрдүк Айыы бэлэҕэ.

Хоһоонньут тас көрүҥ бүрэтин көрбөккө, ис турук, майгы кэрэтин сыаналыыр. Үгүс саха киһитин үрүн тыынын өллөйдөөбүт саха ынаҕа барахсаны туойбута хайҕаллаах. Бу хоһоон ырыа буолан өрөспүүбүлүкэ күрэҕэр бастаан турар.