В.К. Арсеньев аатынан «Уһук Илин» литературнай бириэмийэҕэ сайаапкалары тутуу саҕаланна

РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ — РФ Бырабыыталыстыбатын бэрэссэдээтэлин солбуйааччы Юрий Трутнев көҕүлээһининэн ыытыллар В.К. Арсеньев аатынан «Уһук Илин» Бүтүн Арассыыйатааҕы литературнай бириэмийэ сэттис сезона саҕаланна.

Олунньу 1 күнүттэн бириэмийэ саайтыгар  сайаапкалары туталлар. Сайаапкалары  бэс  30 күнүгэр диэри ыытыахха сөп. Кыттааччы сааһынан, гражданствотынан, олорор сиринэн хааччахтаммат. Сүрүнэ — айымньыта нууччалыы тылынан уонна Уһук Илин туһунан буолуохтаах.

«Россия сегодня»  устуудьуйатыгар бириэмийэ тэрийээччилэрэ пресс-кэмпириэнсийэ оҥордулар.

Уһук Илин федеральнай уокурукка полпред солбуйааччыта, тэрийэр кэмитиэт бэрэссэдээтэлэ Григорий Куранов, РФ Суруналыыстарын сойууһун Приморскайдааҕы отделениетын бэрэссэдээтэлэ, тэрийэр кэмитиэт чилиэнэ  Виктор Суханов кыттыыны ыллылар.

Киирбит үлэлэри суруйааччылар, литературнай кириитиктэр, таһаарааччылар дьүүллүөхтэрэ.