Валентина Карпова: «Дойдуга бэриниилээх буолуу тыыныгар уһуйуу күүһүрүөхтээх»

Өймөкөөн улууһуттан байыаннай эпэрээссийэҕэ бараннар, дойдуларын иннигэр ытык иэстэрин толорууга сулууспалыы сылдьаллар. Үчүгэй нэһилиэгин П.В.Заболоцкай аатынан орто оскуола дириэктэрэ, улуус мунньаҕын дьокутаата Валентина Карпова улууска, нэһилиэккэ, салайар оскуолатыгар бу хайысхаҕа көмөлөөх туох үлэ бара турарын туһунан кэпсээтэ.

— Биһиги улуустан быстах ыҥырыынан 50-тан тахса киһи байыаннай эпэрээссийэҕэ барбыта. Кинилэр барар кэмнэригэр улууска тута суһал ыстаап тэриллибитэ. Таҥас-сап, туттар мал-сал наадатыгар бастаан утаа кыһалҕалаах соҕус этэ. Онно ыстаап сүрүннээһининэн улуус дьаһалтата, дьокутааттара, нэһилиэнньэ бары көмөлөөн, дьоммутугар тута харчынан, таҥаһынан, малынан көмө оҥоһуллан барбыта. Онтон салгыы Владивостокка баран сборга сытар кэмнэригэр тэрилтэлэр, нэһилиэктэр аайыттан харчынан көмөҕө кыттыспыппыт, сибээстэһэ турар этибит. Улууспут дьаһалтата бу дьоммутун кытта өрүү билсэ турар.

— Валентина Кимовна, РФ Бэрэсидьиэнин Этиититтэн тугу ордук биһирии иһиттигит?

— Дойдубут Бэрэсидьиэнэ В.В.Путин Этиитигэр байыаннайдарга уонна кинилэр дьиэ кэргэттэригэр көмөнү оҥорууга Биир пуонда тэриллэрин туһунан этиитин бары сэргии иһиттибит, маны өйүүбүт. Бу — үчүгэй хардыы, сөптөөх дьаһал. Биирдиилээн тус-туһунан ыытардааҕар, биир кииннэммит сиртэн көмөнү тэрээһиннээхтик, сүрүннээн ыытыы быдан ордуга чуолкай. Итиэннэ, биир курдук, бу байыаннай сулууспалаахтарбыт ортолоругар дьоно-сэргэтэ суох дьон эмиэ баара буолуо. Онон көмөнү тэрийии, оҥоруу бу курдук бэрээдэктэнэрэ үчүгэй.

— Эһиги оскуолаҕытын бүтэрбит ыччаттартан байыаннай эпэрээссийэҕэ кыттар киһи баар дуо, кинилэр дьиэ кэргэттэригэр туох өйөбүл баарый?

— Нэһилиэкпит оскуолатын выпускниктара үлэлии сылдьаннар байыаннай эпэрээссийэҕэ барарга ыҥырыы туппуттара. Биир выпускникпыт манна бириискэҕэ үлэлии сылдьыбыта, иккис уолбут Дьокуускай куоракка олорор, онно үлэлиир этэ, онтон барбыта, үһүс выпускникпыт Бурятияҕа хантараагынан сулууспалыы сылдьан, байыаннай эпэрээссийэҕэ кыттан, бааһырыы ылан баран, дойдутугар төннүбүтэ, эмтэнэр. Нэһилиэкпит иһигэр тэрилтэлэринэн сүбэлэһэн, бу уолаттарбыт дьиэ кэргэттэригэр хаһаайыстыбаҕа муус-мас уо.д.а. өттүнэн көмөлөһүүгэ волонтерскай үлэ бара турар.

— Эһиги оскуолаҕыт патриотическай иитиигэ төһө болҕомтотун уурарый? Бу өттүгэр туох санаалардааххын?

— Кыра кэмпилиэктээх оскуолабытыгар 61 оҕо үөрэнэр. Бэйэбит выпускниктарбыт байыаннай эпэрээссийэҕэ сылдьар буоланнар, оҕону патриотическай иитиигэ болҕомтобутун өссө күүһүртүбүт. Бу үлэ уруккуттан баар, бара турар. “Күөх ботуруул” диэн байыаннай-патриотическай оонньууну үгэс курдук ыытабыт. Бу оонньуубутун өссө сайыннаран, байыаннай эпэрээссийэҕэ сылдьар буойуттарбыт дьиэ кэргэттэригэр, кырдьаҕас дьоҥҥо көмөлөһүүнү, оҕолор волонтерскай үлэҕэ кыттыһыыларын сытыырхатан биэрдибит. Оҕону дойдуга бэриниилээх буолууга иитиигэ Арассыыйа үрдүнэн үлэ күүһүрэн, саҥалыы тыыннанан, иитии үлэтэ сааһыланан, чопчуланан эрэрэ үөрдэр.

— Ил Түмэн патриотическай иитии туһунан федеральнай сокуон ылыллыытыгар эрэгийиэн этиилэрин бэлэмниир. Манна тугу учуоттуур сөбүй?

— Сэбиэскэй Сойуус оҕолоро, биһиги көлүөнэ, патриотическай өттүнэн бигэ сүрүннээх буола улааппыт дьоммут. Бу урукку үтүө үгэс оҕо дойдуга бэриниилээх буолуу тыыныгар уһуйуллан, туохха да тулхадыйбат бигэ көрүүлээх буола улаатан тахсыытыгар бэлэм уопут баар. Манна тирэҕирэн, маны салгыы аныгылыы сайыннаран биэрэрбит сөптөөх буолуо. Онон бу өттүн учуоттуулларыгар баҕарыам этэ.

Хас биирдии улуус, оскуола билиҥҥи кэмҥэ иитиигэ тус туһунан бырагыраамалаах, былааннаах олороро ыһыллаҕас соҕус дуу дии саныыбын. Билигин иитии боппуруоһугар биһиги ол уруккуттан баар биир тиһиккэ киирэн үлэлиэхпитин сөп.
Урукку курдук «наада” диэн тыл суох, ол оннугар араас талар быыбар көрүҥэ олус элбэх кэмэ турар. Маннык быһыы оҕо биир сүрүннээх буола улаатыытыгар мэһэйдиир курдук. Онон “бу мин дойдум, кинини көмүскээһин булгуччулаах”, “наада”, “мин эбээһинэһим”, “төрөөбүт, улааппыт Ийэ дойдубар иэһим” диэн тыыҥҥа уһуйуу эрэйиллэр.

Түмүкпэр эттэхпинэ, уолаттарбытын күүтэбит, этэҥҥэ эргиллэллэригэр баҕарабыт! Дойдубут Бэрэсидьиэнэ, Ил Дархаммыт байыаннайдарбытыгар уонна кинилэр дьиэ кэргэттэригэр көмөлөһүү боппуруостарын тус хонтуруолга тутар буоланнар, барыта этэҥҥэ буолуо диэн биһиги эрэллээхпит.