Валерий Эркин: «Дуулаҕа буойуннар-боотурдар»

“Саха сирэ” хаһыат (sakha-sire.ru) хорсун-хоодуот буойуттарбытыгар анаан, дойдуга бэриниилээх буолууга иитэр соруктаах хоһоон куонкуруһун биллэрбитэ.

Куонкуруспут 62-с кыттааччыта Хаҥаластан  Данилов Валерий Софронович-Валерий Эркин:

ДУУЛАҔА БУОЙУННАР-БООТУРДАР

Нацистар күөрэйэн тахсаннар
Күөдьүйэн,күүркэйэн турдулар,
Донбасска олоҕу ыһаннар
Күннэрин сабардыы тууйдулар.

Гиитилэр сиэхсити санатан
Чэрдийбит баастары хаҕылаан
Дойдубут дьоннорун аймааннар
Дьалыҥнаах моҕойдуу сыылланнар.

Эһээлэр суолларын хатылаан
Эйэлээх олохпут туһугар
Эһиэхэ саадаҕы туттаран
Төрөөбүт дойдугут ыҥырар.

Дуулаҕа буойуннар-боотурдар
Дуоҕаны тутаннар бардылар
Дойдуну көмүскүүр сыалынан,
Дьорҕоот эр хааннарын ылынан!

Өһүөннээх санаанан туоланнар
Саалаахтан самныбат сахалар
Сомоҕо модун күүс буоланнар
Өһөрсөр айаҥҥа турдулар.

Атаарар Өлүөнэ эбэҕит,
Атаарар ииппит Сир ийэҕит!
Атаарар Туймаада туоната,
Атаарар Сахабыт норуота!

Далаҕа күүстэри кыайаҥҥыт
Дуоҕаны үрдүктүк тутаҥҥыт,
Боотурдар суолларын хайаҥҥыт
Буойуннар эргиллэн кэлиэххит!