Валерий Федоров: «Үөрэх кыһаларын баазаларын бөҕөргөтүү, преподавателлэр хамнастарын үрдэтии туһунан этиитин үөрэ иһиттибит»

Арассыыйа Бэрэсидьиэнэ Владимир Путин Федеральнай Мунньахха туһаайбыт Анал этиитинэн Арктикатааҕы судаарыстыбаннай агротехнологическай университет ректора, Ил Түмэн дьокутаата Валерий Федоров санаатын үллэстэр:

— Дойду аҕа баһылыга Владимир Путин РФ Федеральнай Мунньаҕар туһаайбыт Анал этиитигэр дойдубут сайдыытын киэҥ хабааннаах бырагырааматын, алта сылга сайдыы сүрүн хайысхатын бэлиэтээтэ. Владимир Путин Арассыыйа барыбыт Ийэ дойдубут, өбүгэлэрбит дойдулара буоларынан эттэ, хаһаайынныы, киэҥ далааһыннаахтык, кэскиллээхтик толкуйдаан сайдыаҕыҥ диэн ыҥырда. Үөрэх кыһаларын материальнай-тэхэньиичэскэй баазаларын бөҕөргөтүү, преподавателлэр хамнастарын үрдэтии боппуруостарын туруорбутун, биллэн турар, биһиги үөрэ иһиттибит.

Наука сайдыахтаах, дойдубут сайдыыта наука саҥа арыйыыларыгар тирэҕириэхтээх диэн этиитэ – биһиги күннэтэ туруулаһар үлэбит хайысхатынан буолар. Итиэннэ ойуур хаһаайыстыбатын уонна үлэһиттэрин өйүүр туһунан этиитин биһирии иһиттибит. Ойууру чөлүгэр түһэрии үлэтэ күүһүрүөхтээҕин, бу салаа үлэһиттэрин хамнастара үрдүөхтээҕин эппитин бары да үөрэ иһиттэхтэрэ. Арктикатааҕы ГАТУ ойуур хаһаайыстыбатын үлэһиттэрин бэлэмнээн таһаарар, онон выпускниктарбыт үлэлэрэ сыаналанарыгар биһиги улахан интэриэстээхпит. Биллэн турар, тыа хаһаайыстыбатын сайдыытын, аһы-үөлү оҥорон таһаарыы, бородууксуйанан хааччыйыы куттала суох буолуутун боппуруостарыгар Владимир Путин этиитин күүттүбүт.

Бэрэсидьиэн бу хайысхаларга эмиэ болҕомтотун ууран, кэскиллээх этиилэри оҥордо. Судаарыстыба баһылыгын илдьитэ улахан үлэ, ырытыы түмүгүнэн оҥоһуллубута өтө көстөр, дойду олохтоохторун этиилэригэр олоҕурбут дьиҥнээх дойду лиидэрин этиитэ диэн ылынным.