Валерий Николаев: «Ил Дархан соруктарын толорууга күүстээх үлэни ыытарга бэлэммит»

Ил Дархан Айсен Николаев Ил Түмэҥҥэ туһаайан этиитин кэннэ Үөһээ Бүлүү улууһун баһылыга Валерий Николаев Ил Дархан  соруктарынан толорууга күүстээх үлэни ыытарга бэлэмин биллэрдэ.

«Доруобуйа харыстабылын эбийиэктэрин тутуу үлэтэ быйыл хаһааҥҥытааҕар даҕаны түргэн тэтимнээхтик ыытыллан иһэрин уонна быйыл Үөһээ Бүлүү улууһугар оҕо балыыһата тутуллан саҕаламмытын бэлиэтээтэ. Айсен Сергеевич анал байыаннай дьайыы кыттыылаахтарыгар бары көрүллэр көмөлөр уонна өйөбүллэр салгыы ыытылларын иһитиннэрдэ, манна муниципальнай былаас уорганнара байыастар социальнай эйгэҕэ адаптацияны ааһалларыгар, дьарыктаах буолалларыгар күүстээх, күргүөмнээх үлэни ыыталларыгар сорудахтаата. Оскуолаларынан мэдиссиинэ үлэһиттэрин төттөрү төннүннэрии туһунан СӨ Доруобуйа харыстабылын уонна Үөрэҕэрии министиэристибэлэринэн сорудахтаабытын тус бэйэм үөрэ иһиттим. Бу дьаһал оҕолорбут доруобуйаларын харыстыырга, маны тэҥэ тыа сиригэр саҥа үлэ миэстэтэ тахсарын хааччыйыа. Ону таһынан ойуур харыстабылыгар уонна көмүскэлигэр эбии үп-харчы федеральнай бүддьүөттэн көрүллүө. Быйыл биһиги улууспутугар улахан ойуур баһаардара туран, бүтүн өрөспүүбүлүкэттэн ойуур харыстабылын үлэһиттэрэ кыттыылаах ойуур баһаарын бохсуу үлэтэ тохтоло суох уһун сайын устата ыытыллыбыта. Ити кэмҥэ үлэһит илиитэ, тиэхиньикэ тиийбэтэ улахан охсуулаах этэ. Онон Дойду Бэрэсидьиэнэ Владимир Путин өйөбүлүнэн 2025 сылтан ойуурдары уоттан харыстыырга анаммыт федеральнай бүддьүөттэн көрүллэр үп-харчы 1,6 млрд.солкуобайтан 4,3 млрд. солкуобайга тиийэ улааппытын, маны сэргэ Саха Сиригэр 5 саҥа авиаотделение арылларын, авиалесохрана үлэһиттэрэ 703 киһиэхэ, ойуур харыстабылын үлэһиттэрэ 1350 киһиэхэ тиийэ элбиирин сэргии иһиттим. Бу дойду Бэрэсидьиэнэ Владимир Путины кытта биһиги Ил Дархаммыт Айсен Николаев таһаарыылаах үлэтин көрдөрөр.

«Куттала суох уонна хаачыстыбалаах суоллар» национальнай бырайыагынан Саха Сиригэр 395 км уһуннаах айан суола оҥоһуллубут. Маныаха биһиги Үөһээ Бүлүүбүт улууһугар икки нэһилиэккэ аспаал суоллар оҥоһуллубуттарын бэлиэтиибин. Демографияҕа хайысхатынан дьиэ кэргэн сайдыытыгар Ил Дархан болҕомтотун ууран, «Дьиэ кэргэн» өрөспүүбүлүкэтээҕи ийэ хапытаала үһүс эрэ оҕоҕо эрэ буолбакка, төрдүс, бэһис, онтон да салгыы оҕо төрүүр түгэнигэр бэриллэригэр Бырабыыталыстыбаҕа кылгас кэм иһигэр саҥа сокуон барылын оҥорон киллэрэригэр сорудахтаата. Бу бырайыак үлэҕэ киирдэҕинэ элбэх оҕолоох дьиэ кэргэттэрбит Сахабыт Сиригэр өссө элбиэхтэрэ диэн эрэлбит улахан. Эһиилги сыл — Арассыыйаҕа бэлиэ сыл. Ол курдук, Улуу Кыайыы 80 сылын бэлиэтиибит. Бу бэлиэ сылынан Аҕа Дойду Улуу сэриитин бэтэрээннэригэр, огдооболоругар, оҕолоругар, Ленинград блокадатын кыттыылаахтарыгар, о.д.а. туһаайыллыбыт төлөбүрдэр кээмэйэ үрдүүрүн туһунан биллэрдэ. Үбүлүөйдээх, өрөгөйдөөх 2025 сылы Айсен Сергеевич өрөспүүбүлүкэҕэ Ийэ дойдуну көмүскээччи сылынан биллэрилиннэ. Эһиил биһиги Ил Дархан Айсен Николаев соруктарын бары хайысханан күүстээх үлэни ыытарга бэлэммит». Үөһээ Бүлүү улууһун дьаһалтатын пресс-сулууспата.