Валерий Шадрин: «Бирииспит вездеход бэлэм буолла!

Бу күннэргэ Дьокуускай куоракка Федеральнай Сабантуй ыытылла турарынан үгүс тэрээһин буола турар.

Биир сүрүн тэрээһининэн сарсын, бэс ыйын 14 күнүгэр, «Туймаада» стадиоҥҥа Арассыыйатааҕы мадьыны уонна корэш күрэхтэһиилэр буолуохтара. Мадьыны күрэхтэһиитин сүрүн бирииһинэн «Рысь» вездеход туруоруллар. Бу туһунан  «Рысь» хампаанньа салайааччыта Валерий Шадрин санаатын үллэһиннэ:

—Сарсыҥҥы күрэхтэһиигэ бирииспит бэлэм буолла. Үрдүк таһымнаах күрэхтэһиигэ биһиги оҥорон таһаарар вездехоппут сүрүн бириис буолбута үөрдэр. Бирииһи өрөспүүбүлүкэбит Ил Дархана Айсен Николаев туттарыахтаах. Күрэхтэһээччилэргэ ситиһиини баҕарабын, — диэтэ.

Бэлиэтээн суруйдахха, «Рысь» хампаанньа бэйэтэ оҥорор вездеходун быйыл Арассыыйа дьоруойугар Андрей Григорьевка-Тутаҕа бэлэхтээн турар.