Валерий Жондоров: «Экэниэмикэбит салгыы туруктаах буолуоҕа»

Үп-харчы өттүнэн билиилээх буолуу компетенциятын өрөспүүбүлүкэтээҕи киинин кылаабынай эспиэрэ Валерий Жондоров 2026–2028 сылларга судаарыстыбаннай бүддьүөт туһунан сокуон барылыгар санаатын эттэ. Кини өрөспүүбүлүкэ хааһынатыгар дохуоту уонна ороскуоту оҥорууга тэҥнэһиилээх сыһыан суолтатын тоһоҕолоото.

«Үс сыллаах судаарыстыбаннай бүддьүөт туһунан сокуон барылын бастакы ааҕыытыгар 2026 сылга уопсай дохуот  309 768,2 мөл. солкуобайга тэҥнэһэр, ол иһигэр нолуок дохуота 212 800,1 мөл. солк. уонна нолуоктан таһынан дохуот 11 826 мөл. солк. Маны тэҥэ,  уопсайынан  нолуок дохуота  2025 сыллааҕар 10,1 млрд солк. үрдүк буолара сабҕаланар. Ол өрөспүүбүлүкэҕэ судаарыстыбаннай бүддьүөт ороскуотун үөскэтэр сүрүн ресурсалары хааччыйар экэниэмикэбит салгыы туруктаах буоларын туоһулуур», — диэн бэлиэтээтэ Жондоров.

«Бу түһүмэххэ 2026 сыллааҕы дохуот сабаҕалааһынынан «Территориялары сайыннарыы пуондата» судаарыстыбаннай хампаанньаттан уонна «РусГидро» хампаанньаттан энэргиэтикэ тарыыптарын тэҥнииргэ туттуллар үп-харчы киирбэт. Федеральнай бүддьүөттэн үп киириитин кээмэйэ, ол иһигэр,  граннары, эбии субсидиялары уонна субвенциялары ылыы эмиэ чуолкайданыаҕа. Мин санаабар, өрөспүүбүлүкэ 2026 сыллааҕы судаарыстыбаннай бүддьүөтүн параметрдара үрдүөхтэрэ уонна 2025 сылга былааннаммыт сыыппаралары куоһарыахтарын сөп», — диэн эспиэр быһаарда.

Кини этэринэн, 2026 сылга судаарыстыба бүддьүөтүн уопсай ороскуота 317 339,7 мөл. солк. Бу суума 2025 сыллааҕы бүддьүөт бастакы ааҕыытыгар бигэргэммит ороскуотуттан 23 296,8 мөл. солк. элбэх.

«Саамай сүрүнэ, 2026 сылга бүддьүөт эйгэтигэр «тус сыаллаах» уонна атын категориялаах үлэһиттэр хамнастарын индексациялыырга, МРОТ кээмэйин  20%-нан үрдэтэргэ эбии 36 млрд. солкуобай көрүлүннэ», — диэн Валерий Жондоров эбэн эттэ.

Кини эрэгийиэн үп-харчы туруктаах буолуутун хааччыйыы уонна ресурсалары сөптөөхтүк үллэрии сүрүн соругунан хааларын бэлиэтээтэ.

«СӨ Бырабыыталыстыбатын иннигэр парламент куорпуһун кытта бииргэ, бастатан туран, бары социальнай эбэһээтэлистибэлэри, ону тэҥэ гражданнары быһаччы өйүүр хайысхалары толорууга туһуламмыт ороскуоттары инники күөҥҥэ таһаарыыга эппиэтинэстээх уонна тэтимнээх үлэ турар», — диэн Жондоров тоһоҕолоон бэлиэтээтэ.

Сиһилии: https://www.sakha.gov.ru/news/13947