Уус удьуордаах Валерия Малгина ыһыахтыыр сиргэ киирэр аарканы оҥордо

Уус удьуордаах Валерия Малгина Таатта улууһун Уус Тааттатыттан төрүттээх. Кини бу сайын төрөөбүт дойдутугар ыһыахтыыр сиргэ киирэр аарканы уһанан оҥордо. Ол туһунан саайтпытыгар кэпсээтэ.

Валерия Малгина Уус Тааттаҕа төрдүс кылааска диэри үөрэммит, онтон Намҥа дьонун кытта көһөн барбыт. Инженер идэтин баһылаабыт, билигин оҕотун көрөн олорор. Кини ураты дьарыгын, удьуордарын туһунан маннык кэпсиир:

— Быйыл сайын Уус Таатта нэһилиэгин баһылыга эһэбэр кэлэн: «Ыһыахтыыр сиргэ киирэр аарканы оҥоруон дуо?» диэн көрдөспүт этэ. Онуоха эһэм миэхэ төлөпүөннээн, оҥоруохха диэн этии киллэрбитэ. Толкуйдаан баран, сөбүлэспитим. Онон Уус Тааттаҕа уһана барыам иннинэ Дьокуускайга «Үс Хатыҥ» комплекска тиийэн оҥоһуктары көрбүтүм-үөрэппитим, эскиис оҥорбутум. Ааркабытын эһэм сүбэтинэн уонна көмөтүнэн икки ый устата оҥордубут.

Мин уус удьуордаахпын. Эһэм Владимир Семенович Малгин маһынан, тимиринэн уһанар, уруһуйдуур дэгиттэр талааннаах киһи буолар. Эбэлээх эһэм түөрт уол оҕолоохтор. Кинилэр бары илиилэригэр талааннаахтар, уһаналлар. Ол курдук, мин аҕам Владислав Владимирович — мас ууһа, маастар. Кини сахалыы мусукаалынай үнүстүрүмүөннэри, миэбэллэри, сэргэни оҥорор, балаҕан, дьиэ тутар. Онон кыра эрдэхпиттэн дьонум уһаналларын көрө улааппытым.

Ыһыахтыыр сиргэ аарканы уһаныы бастакы улахан үлэбинэн буолар. Бу да иннинэ дьиэ интерьерин, миэбэли тупсаран оҥорор этим. Уһаныы — эр киһи дьарыга, ол эрээри кэрэ аҥаар да уһанара омнуоламмат дии саныыбын. Төрүттэрбэр уустар баар буолан, ол миэхэ сабыдыаллаатаҕа. Ылсыбыт үлэм санаам хоту табылынна дии саныыбын. Инникитин сахалыы оһуордары чинчийэн үөрэтиэхпин, оһуордаан-мандардаан улахан сундуук оҥоруохпун баҕарабын.

Хаартыскалары, видео-устууну Валерия Малгина ыытта.