Вандаллар ыскамыайканы ууга бырахпыттар

Киин куораппыт кэлиҥҥи сылларга тупсан, дьон сынньанарыгар анаан араас былаһааккалар, искибиэрдэр оҥоһуллаллар. Ол гынан баран хара санаалаах дьон ордук оптуобус тохтобулларын, ыскамыайкалары алдьатыылара тахса турар.

Ааспыт нэдиэлэҕэ «Таалай күөл» уопсастыбаннай  сиргэ  кимнээҕэ биллибэт дьон ыскамыайканы тоҕо тардан баран ууга бырахпыттар. Ону ааһан өссө тааска маарынныыр олорор сири эмиэ.

Дьокуускай куорат  баһылыга Евгений Григорьев телеграмҥа ханаалыгар:

—  Туһааннаах сир «Дирекция парков и общественных пространств» МАУ көрүүтүгэр баар. Онон бэҕэһээ ыскамыайканы ууттан таһааран төттөрү миэстэтигэр уурдулар.  Итиэннэ полицияҕа сайабылыанньа суруйдулар.  Ытыктабыллаах куорат олохтоохторо, өскөтүн эһиги туһааннаах быһылааны көрбүт буоллаххытын, миэхэ  «ВКонтакте» тус страницабар  суруйан биллэриҥ, — диэн суруйда.