Василий Данилов «Двоеборье-2026» күрэхтэһиини тэрийдэ

Бу сыл тохсунньу 10- 11 күннэригэр Туймаада туонатыгар —  Дьокуускайга сүрдээх интэриэһинэй тэрээһин буолан ааста. “Двоеборье – 2026” диэн ааттаах күрэхтэһиини өрөспүүбүлүкэҕэ биллэр успуорт бэтэрээнэ Василий Данилов алтыс сылын тэрийэн ыытта.

Василий Трифонович бэйэтэ Сунтаартан төрүттээх,  юрист идэлээх , олоҕун устатын тухары успуорду арахсыспат аргыс оҥостубут киһи эбит.

Мин кини туһунан истибитим син балайда буолла эрээри, бу быйыл эрэ тус бэйэтин көрсөн билсэн, алтыстым. Ыытар тэрээһинигэр аан бастаан сылдьан, көрөн-истэн, сырдатарга сананным. “Сүүстэ истибиттээҕэр, биирдэ көрбүт ордук”, — диэн мээнэҕэ эппэттэр.

Василий Трифонович остуол тенниһинэн бэйэтин өйдүүр буолуоҕуттан дьарыктаммыт. 2012 — 2015 сс. Остуол тенниһин өрөспүүбүлүкэтээҕи федерациятын салайбыта.  Успуорт бу көрүҥэр 1-кы разрядтаах.

2019 сыллаахха Кытайга Хэйхэ куоракка норуоттар икки ардыларынааҕы турнирга боруонса мэтээли ылбыта.

Арассыыйаҕа бэтэрээннэр чемпионаттарыгар 2 төгүл (булкааһык паараҕа)  Иваново куоракка (2023 с.), Кстово куоракка (2024 с.) боруонса мэтээлгэ тиксибитэ.

Саха сирин турнирдарыгар элбэх төгүллээх чөмпүйүөн уонна призер.

Бу “Двоеборье-2026” тэрээһин икки көрүҥүн сыала-соруга — дуобакка уонна остуол тенниһигэр дэгиттэр сайдыылаах спортсменнар ааттарын быһаарыы буолар.

Күрэхтэһии араас улуус дьонун биир сомоҕо гына түмпүтүн олус биһирээтим. Ол курдук, Бүлүү, Эдьигээн, Амма, Мэҥэ Хаҥалас, Өймөкөөн, Таатта, Хатас, Үөһээ Дьааҥы спортсменнара күөн көрүстүлэр. Биллэн турар, 13 киһилээх  саамай элбэх кыттааччылааҕынан  Дьокуускай куорат буолла.

Тэрээһин бастакы күнэ —  дуобакка күрэхтэһии “Үһүс көлүөнэ оскуолатын” дьиэтин саалатыгар буолбута. 24 киһи кыттыбыта.

Тэрээһин үөрүүлээх аһыллыытыгар Василий Трифонович олоҕун аргыһа, кинини өрүү өйүүр, көмөлөһөр тапталлаах кэргэнэ Мария Ивановна кытынна. “Хомус дьүрүскэҥ тыаһа эһиги толкуйгутун тобуллун, санааҕытын сааһылаатын!”- диэн туран, хомус тыаһынан  махталын биллэрдэ, эйэҕэс  эҕэрдэтин тириэртэ.

“Теннис- туйгун турук туоһута”

Иккис күн “Дохсун” успуорт комплексыгар теннискэ күрэхтэстилэр. Күрэхтэһиигэ 4 кэрэ аҥаар кыттан, олус киэргэттилэр, тыҥааһыны өссө күүһүртүлэр.  Галина Заровняева бастакы дьоһун кыттыыта буолла. Римма Турнина ситиһиилээхтик кыттыбытын таһынан өссө судьуйанан үлэлээтэ. Евдокия Другина, Анна Игнатьева утарылаһааччыларыттан олох хаалсыбатылар.

Анна Игнатьева Бүлүүттэн кэлэн кытынна. “Дьиэ кэргэҥҥэ иитиини өйүүр кииҥҥэ” эбии үөрэхтээһин исписэлииһэ эбит. “Бу маннык тэрээһиҥҥэ биһиги, тыа сирин дьоно, кылгас да кэмҥэ кыттан, уопут ыларбыт олус наадалаах. Биир дьарыктаах дьоммун кытта алтыһан астынным”, — диэн санаатын үллэһиннэ.

Өссө биир киһини тоһоҕолоон бэлиэтиэхпин баҕарабын. 80-с хаарыгар үктэнээри сылдьар А. П. Герасимованы кытта билсэн, олус диэн сөхтүм-махтайдым уонна кинини ытыктаатым.

“Бэйэм мэдиссиинэ эйгэтигэр 52 — 53 сыл стажтаахпын. Успуорт  бэтэрээнэбин. Остуол тенниһинэн 15 сыл устата дьарыктанным уонна ити сыллар тухары судьуйалыыбын. Арассыыйаҕа 2 төгүллээх призер буолабын. Хабылыкка, хаамыскаҕа эмиэ бириистээх миэстэлэргэ тиксэбин. Хаамарбын олус сөбүлүүбүн. Күҥҥэ 4 — 5 км хаамабын.

“Движение — это жизнь”, — диэн сөпкө этэллэр. Хамсаныы барытыгар олус туһалаах. Миэхэ тус бэйэбэр күүс-сэниэ биэрэр, ыйааһыҥҥын тута сылдьаҕын.

Бу остуол тенниһэ успуорт саамай маассабай көрүҥэ буолуон сөп. Тоҕо диэтэххэ, бу көрүҥҥэ киһи эт-сиин эрэ өттүнэн буолбакка, өй-санаа өттүнэн эмиэ сайдар. Былчыҥнарыҥ бары тэҥҥэ үлэлииллэр. Дьоҥҥо-сэргэҕэ, ордук эдэр ыччакка сүбэлиэм этэ —  успуордунан утумнаахтык дьарыктаныҥ. Эбэһээт чөмпүйүөн  буолар туһугар буолбакка, тус бэйэҕитигэр туһатын өйдөөн туран, — диэтэ Антонина Прокопьевна.

Кыайыылаахтар

Икки күн устата кыттааччыларга сөптөөх усулуобуйа тэрилиннэ. Ол курдук, күрэстэһээччилэр итии чэйинэн,  кофенан, иһэр уунан  хааччылыннылар.

“2 көрүҥ” күрэх түмүктэрэ манныктар:

Захаров Петр 1 миэстэҕэ тиксэн, 10 000 суумалаах сэртипикээт  ылла. Сүрүн наҕараадаҕа – Чөмпүйүөн куубагар тигистэ.

Алексеев Михаил — 2 миэстэ — 7 000 солк.

Андреев Максим — 3 миэстэ — 5 000 солк.

Кыайыылаахтарга тупсаҕай көстүүлээх, суруктаах-бичиктээх мэтээллэр, сыаналаах бириистэр туттарылыннылар.

Күрэх биир бэлиэ түгэнэ — судьуйалар быһаарыыларынан “Өрө тахсыы” (Рывок) анал аат Өймөкөөнтөн успуорт бэтэрээнэ Василий Винокуровка иҥэрилиннэ. Кини былырыыҥҥы көрдөрүүтүн лаппа тупсаран, дипломунан уонна сыаналаах бирииһинэн наҕараадаланна.

“Призердары таай” диэн ааттаах онлайн-күрэххэ Дмитрий Сивцев кылбар кыайыыта анал бирииһинэн бэлиэтэннэ.

“Бу тэрээһиммэр сэҥээрии баар буолан, 6-с төгүлүн ыытар буоллум. Биллэн турар, саастаах, биэнсийэлээх киһиттэн маннык улахан тэрээһини ыытар элбэх сыраны-сылбаны, үбү-харчыны эрэйэр. Ол гынан баран, тэрээһиним дьоҥҥо туһалаах, күүтүүлээх, наадалаах  буоллаҕына, тохтоон хаалбакка, иннибит диэки дьүккүйэн иһиэххэ наада. Ким да биһиги олохпутун туораттан кэлэн интэриэһинэй оҥорбот”, — диэн Василий Трифонович эппитин олус биһирии иһиттим.

Василий Трифонович курдук, маассабай успуорду пропагандалыыр, чөл олоҕу түстүүр дьону бэчээккэ сырдатан, эдэр ыччакка, үүнэр көлүөнэҕэ үтүө холобур оҥостуохха наада.

Норуот сөбүлээн истэр “Тэтим” араадьыйатын эбэтэр “Саха” НКИХ биэриитигэр ыҥыраллара буоллар диэн баҕа санаабын этэбин.

Тэрээһини  В.Данилов маннык тылларынан түмүктээтэ:

“Күрэхтэһии олус бэркэ ааһан, сүргэм  көтөҕүлүннэ. » Үһүс көлүөнэ оскуолатын”, “Дохсун” успуорт комплексын кэлэктииптэригэр, кыттааччыларга, судьуйаларга,  наҕараадаларбын бэлэмнээбит “Офсет” үлэһиттэригэр, бары өйөөбүт, көмөлөспүт дьоммор махтанабын!

Туругурдун улуу теннис —

Туйгун турук туоһута.

Айхалланнын дуобат оонньуу

Абылаҥнаах мөккүөрэ! 

Күрэхтэһии кэнниттэн кыттааччылар санааларын үллэһиннилэр. Кылгастык быһа тардан билиһиннэриэм:

“Ытыктабыллаах Василий Трифоновичка күрэхпитин хаһыс да сылын ис сүрэҕиттэн кыһаллан, түбүгүрэн туран ыытарыгар махтанабын.

“Тэрээһин, судьуйалааһын барыта үрдүк таһымҥа ааста. Кыттааччылар бары олус өрө көтөҕүллэн сырыттыбыт. Кыайыылаахтар таһымнарын көрөн -истэн, эһиилги күрэххэ өссө күүскэ бэлэмнэнэн кыттар санаа киирдэ”.

“2 көрүҥ” күрэх өссө да сайда турдун. Дьон-сэргэ махтала , үтүө-мааны тыла, Василий Трифонович, эйигин, дьиэ кэргэҥҥин араҥаччылаатын!”

Тамара Винокурова, уопсастыбаннай кэрэспэдьиэн, педагогическай үлэ бэтэрээнэ, Учууталлар учууталлара, “Өймөкөөн” түмсүү чилиэнэ.

Хаартыскалары: Т.Винокурова ыытта