Василий Миронов: «Ийэ дойдуну көмүскээччи сылыгар «Дьоруойдар кэмнэрэ» бырагырааманан үлэлиэхпит»

СӨ Аҕа баһылыгын иһинэн үлэлиир инновационнай менеджмент Үрдүкү оскуолатын ректора Василий Миронов дойду Аҕа баһылыгын этиилэригэр санаатын үллэһиннэ:

— РФ Бэрэсидьиэнэ Владимир Путин Анал этиитин истэ олорор дьон сарсыҥҥы күн эрэллээх, бигэ туруктаах буолуутун туһунан истиэхтэрин баҕараллара чуолкай.

Маныаха дойду Аҕа баһылыга Владимир Путин, төһө да уустук балаһыанньаҕа олордорбут, экэниэмикэбит туруга бигэтин бэлиэтээтэ. Ил Дархан Айсен Николаев бэйэтин Анал этиитигэр өрөспүүбүлүкэ экэниэмикэтин дойду таһымын кытта тэҥнээн көрбүтэ уонна онно эппиэттэһэр диэн эппитэ. Биллэн турар, РФ Бэрэсидьиэнэ Анал этиитигэр байыаннай дьайыыга сылдьар дьоммутугар, кинилэр дьиэ кэргэттэригэр улахан болҕомтону уурарбытыгар соруйда. Бу — биһиги ытык иэспит. Саха сиригэр Ийэ дойдуну көмүскээччи сыла биллэриллибитинэн сибээстээн, биһиги тэрилтэбит эһиилги сылга Арассыыйаҕа ыытыллар «Дьоруойдар кэмнэрэ» каадыры бэлэмнээһин бырагырааматын чэрчитинэн өрөспүүбүлүкэбитигэр маннык үлэни тэрийэн, байыаннай дьайыы кыттыылаахтарын кытта ыкса үлэлэһиэхпит.