Василий Неустроев: «Байыастар махтаналлар»

Өлүөхүмэ улууһун Киндигир национальнай нэһилиэгин баһылыга Василий Неустроев байыаннай эпэрээссийэҕэ баран сулууспалыы сылдьар уолаттарга улуустан гуманитарнай көмөнү илдьиһэн кэлбитэ. Онно байыастар: «Дойдубутуттан кэлэ турар көмө үчүгэй, дьоммутугар биһигини суохтаппаттарыгар биир дойдулаахтарбытыгар, салалтаҕа махтанабыт” диэн эппиттэрин кэпсээтэ.

— Байыаннай эпэрээссийэ саҕаланыаҕыттан биһиги нэһилиэктэн түөрт уолбут онно бойобуой сулууспаҕа сылдьар. РФ Бэрэсидьиэнэ Владимир Путин, Ил Дархан Айсен Николаев уонна улууспут баһылыга Николай Харбин сорудахтарыгар олоҕуран, улууспутугар нэһилиэк аайы суһал ыстааптар уонна волонтердар үлэлииллэр. Өлүөхүмэ улууһугар волонтер хамсааһынын икки киинэ үлэлиир. Биир киин — байыаннай дьайыыга кытта барбыт байыастарга гуманитарнай көмөнү оҥорууга, иккис — байыаннай сулууспалаахтар дьиэ кэргэттэригэр көмөлөһүүгэ, дьиэҕэ-уокка араас үлэлэргэ тус аадырыстаах көмөнү оҥорууга үлэлииллэр. Улууска маны таһынан саллааттар ийэлэрин, аймахтарын кэмитиэтэ үлэлиир. Үлэ кэлэктииптэрэ эмиэ көрө-истэ, көмөлөһө сылдьаллар.
Нэһилиэккэ байыаннай сулууспаҕа сылдьар уолаттарбыт дьиэ кэргэттэриттэн киирбит сайаапкаларынан волонтердар көмөлөрө оҥоһулла турар. Тыа нэһилиэгэр олорорбут быһыытынан мас, муус чааһыгар, онтон да атын кыһалҕалары быһаарыыга күүс-көмө буолабыт. Нэһилиэкпит дьоно-сэргэтэ аһымал аахсыйаларга, дьаарбаҥкаларга кыттаннар, ким таҥаһынан, ким аһынан көмөлөһөллөр. Бу гуманитарнай көмөбүтүн биһиги улуус волентердарын ыстаабыгар туттарабыт. Манна быһаалкаларбыт наарданаллар уонна уолаттарбытыгар тиэрдиллэллэр.
Улуус салалтатын өйөбүлүнэн Митюков Алексей Александровиһы кытта иккиэ буоламмыт ахсынньы 17 күнүттэн олунньу 17 күнүгэр диэри байыаннай эпэрээссийэҕэ сылдьар уолаттарга гуманитарнай маллары, баһыылкалары тиэрдиигэ бара сырыттыбыт. Оройуон баһылыга өйөөн, Ростовка волонтер киинигэр массыына перегоннаан тиэрдиллибитэ. Биһиги ол массыынанан уолаттарга гуманитарнай көмөнү тиэрдитэлээтибит. Бу сылдьар бириэмэбитигэр өрөспүүбүлүкэ элбэх улуустарыттан Анаабыртан, Уус Алдантан, Чурапчыттан, куораттан, о.д.а. улуустартан бэрэстэбиитэллэр тиийэннэр, бэйэлэрин уолаттарыгар баһыылкалары, гуманитарнай көмөлөрү тиксэртээтилэр. Нэһилиэктэртэн, улуустартан, Саха сириттэн көмө үчүгэй диэн уолаттарбыт санаалара бөҕөх. Тыыл өттүттэн көмө баара олох биллэр.
Уолаттар туруктара бойобуой, санаалара бөҕө, бары бииргэ ыкса тутуһан сылдьаллар. Саха сириттэн тиийбит уолаттар булка, тыаҕа, сиргэ-уокка сылдьа үөрүйэх буоланнар, төһө да онно уустугун иһин, бэйэлэригэр эрэллээхтик туттан-хаптан сылдьар эбит.
Ростовка массыынабыт өрөмүөҥҥэ турар кэмигэр, биһиги байыаннай госпиталга көмөҕө түөрт күн үлэлээбиппит. Онон өрөспүүбүлүкэ, улуус салалталара өйөөннөр, «Саха координационнай киинин” уолаттарыгар көмөлөстүбүт. Госпиталга бааһырбыт саха саллаата киирдэҕинэ, манна кинини саха быраастара, волонтердара көрсөллөр, бары өттүнэн тута көмөлөһөн бараллар. Волонтердар өттүлэриттэн туох наада буоларынан тиис суунартан, тапочкаҕа, спортивнай таҥаска, сотовайга, симкаҕа тиийэ булан биэрэн гуманитарнай көмө, өйөбүл күүскэ оҥоһулла турар.
Байыастар дьиэ кэргэттэрин умнубакка, биһигини суохтаппакка, өйүү, көмөлөһө тураллар диэн биир дойдулаахтарыгар, салалтаҕа олус махтаналлар. Хорсун-хоодуот байыастарбытыгар уонна кинилэр чугас дьонноругар биһиги туох кыалларынан көмөлөһөр эбээһинэспит буоллаҕа.