Василий Попов: «Саха сирин баһылыгын өйөбүлэ салгыы үлэлииргэ көҕүлүүр»

«Бары бииргэ» өрөспүүбүлүкэтээҕи кииҥҥэ иистэнэр сыах үлэтин саҕалаата. Иистэнньэҥнэр байыаннай дьайыыларга сылдьар байыастарбытыгар анаан экипировка тигэллэр. Ону таһынан, киин волонтердара бородуукта нобуорун, эми-тому хомуйаллар, окуопа чүмэчитин оҥороллор, мобилизацияламмыт дьон дьиэ кэргэттэригэр көмөлөһөллөр.

Уһук Илин федеральнай уокурукка «Эдэр гвардия» сүрүннээччитэ Василий Попов этэринэн, тустаахтарга улахан көмө оҥоһуллуута болҕомтоҕо ылыллар.

«Өйөбүл, көмө мэлдьи наада, онон волонтердар үлэлэрэ наадалаах. Үгүспүт элбэх бириэмэтин сүтэрэр, ол гынан баран, бары өйдүүбүт, биһиги көмөбүт, өйөбүлбүт наадатын. Ити хайысха былаас өттүттэн өйөнөрүн олус улахан суолталаах дии саныыбын. Ол курдук, холобур, бу күннэргэ волонтерскай кииҥҥэ Ил Дархан Айсен Николаев сылдьан үлэни-хамнаһы кытары билистэ. Ил Дархан өттүттэн итинник болҕомто ууруллуута, волонтердары инники үлэлэригэр көҕүлүүр, ол аата биһиги сөптөөх суолунан баран иһэрбитин өйдөтөр», — диэн Василий Попов бэлиэтиир.