Василий Сивцев байыастарга анаан икки куул собону туттарда

Бу күннэргэ Волонтер күнүн бэлиэтээн аастыбыт. Онно элбэх волонтерскай хамсааһын үтүө санаалаах, амарах дууһалаах  волонтердара кытыннылар. Кинилэр хайдах курдук үлэлииллэрин бары көрө-билэ сылдьабыт.  Байыаннай таҥаһы тигии, харыстыыр сиэккэлэри баайыы, гуманитарнай көмөнү хомуйуу, харысхаллары оҥоруу – маны барытын биһиги волонтердарбыт илиилэрин сылааһын иҥэрэн оҥороллор.

Бу волонтердар хамсааһыннарыттан биирдэстэрэ “Якутия с тобой!” уопсастыбаннай хамсааһын буолар. Соторутааҕыта “Якутия с тобой!” хамсааһын байыаннай дьайыы байыастарыгар анаан собо балык хомуйуутугар (хатаран, эрийэн) уха оҥорон ыытарга, Саха сирин олохтоохторугар ыҥырыы таһаарбыта.

Ол ыҥырыыны ылынан, таба өйдөөн Уус Алдан улууһун Бэйдиҥэ нэһилиэгин олохтооҕо Василий Семенович Сивцев, бүгүн “Якутия с тобой!”  ыстаабыгар икки куул собону аҕалан туттарда. Кини байыастар түргэнник кыайан-хотон кэлэллэригэр баҕарда, өрөспүүбүлүкэ олохтоохторун аахсыйаҕа кыттыһалларыгар ыҥырда.

Билиҥҥи уустук балаһыанньаны өйдөөн, Василий Сивцев холобурун батыһан,  байыаннай дьайыыга сылдьар уолаттарбытыгар көмөлөһөргүтүгэр ыҥырабыт. Көмөнү Дьокуускай куоракка, Бестужев-Марлинскай уул., 5-гэр, ДОСААФ олбуорун иһигэр баар бокска аҕалыаххытын сөп.