ВЭФ-2023: «РЭО» хампаанньа бөҕү араарар ыстаансыйаны тутууну үбүлүөҕэ

«Российский экологический оператор» кытаанах хомунаалынай тобоҕу хомуйуу комплекснай систиэмэтин оҥорор хампаанньа Дьокуускай куоракка бөҕү араарар ыстаансыйаны тутууга көмөлөһүөҕэ. Бу туһунан үбүлээһин сөбүлэҥэ балаҕан ыйын 12 күнүгэр Владивостокка Илиҥҥи экэнэмиичэскэй пуорум кэмигэр түһэрилиннэ. 

Бу ыстаансыйаны «Айылга» хампаанньа тутуоҕа. «РЭО» бу хампаанньаҕа бырайыак уопсай сыанатын 95%-гар диэри сууматын 7% ыстаапкалаах 10 сылга иэс биэрэргэ бэлэм.

«Билиҥҥитэ бырайыак судаарыстыбыннай эспэртиисэни ааһа сылдьар. Тиэхиньиичэскэй өттүнэн үчүгэй түмүк кэллэ, симиэтэ ааһарын күүтэбит. «РЭО» кытары үлэ түмүгүнэн Дьокуускайга ыстаансыйа тутуллан үлэҕэ киириэҕэ диэн эрэнэбин», — диэтэ Айсен Николаев.

Ыстаансыйа сылга 150 туонна кытаанах хомунаалынай тобоҕу араарар буолуоҕа. Саҥа эбийиэк Вилюйскай тракт 8 км тутуллуоҕа. Бүгүҥҥү күҥҥэ манна ыстаансыйа тутуллуохтаах сирин бэлэмнии сылдьаллар.