ВЭФ-2023: Саха сиригэр киинэ павильонун тутуохтара

Ил Дархан Айсен Николаев Владивостокка буолбут Илиҥҥи экэнэмиичэскэй пуорумҥа өрөспүүбүлүкэ киинэтэ сайдарын туһугар туох үлэ ыытыллыбытын туһунан кэпсээтэ.

«Билигин Саха сирин киинэтэ соҕотох Арассыыйаҕа эрэ буолбакка, аан дойдуга барытыгар улаханнык билиннэ, дьону сөхтөрдө. Салҕыы бу киинэ эйгэтэ эрэ буолбакка, улахан экэниэмикэ салаата буоларын туһугар кэпсэтии бара турар. Биһиги бэрэсидьиэммит Владимир Путин ыам ыйыгар 9 пууннаах анал докумуону  таһаарбыта. Онтон икки сорудаҕа Саха сирин кытары чопчу сибээстээх. Ол курдук, Саха сиригэр үөскээбит «Экстра синема” диэн тыа сиригэр, кыра куораттарга киинэ көрдөрөр бырайыагы Арассыыйа үрдүнэн тарҕатарга диэн эппитэ. Иккиһинэн, Дьокуускай куоракка толору киинэ оҥорор павильону бу кэлэр сылларга тутарга диэн сорудахтаабыта», — диэтэ Айсен Николаев.

Ил Дархан бэлиэтээбитинэн, билигин бу павильон бырайыагын оҥоро сылдьаллар.

«Пуорум кэмигэр киинэ эйгэтин кытары сибээстээх Арассыыйа уонна аан дойду исписэлиистэрин кытары кэпсэттибит. Хайдах павильон оҥоһуллуохтааҕын, ханнык технология туттуллуохтааҕын уо.д.а атын боппуруостары дьүүллэстибит. 2025-2026 сс. диэри бу эбийиэги тутан үлэҕэ киллэрэргэ былаанныыбыт», — диэн кини бэлиэтээтэ.