ВЭФ-2023: «Сбербаан» ААУо уонна «Саха сирин тимир суоллара» АХ Кытайга тиийэр суолу тутууга илии баттастылар

Балаҕан ыйын 11 күнүгэр VIII Илиҥҥи экэнэмиичэскэй пуорум чэрчитнэн «Сбербаан» ААУо уонна «Саха сирин тимир суоллара» АХ бииргэ үлэлэһии туһунан сөбүлэһии түһэристилэр.

Докумуоннарга «Сбербаан» ААУо Байкааллааҕы баанын бэрэссэдээтэлэ  Александр Абрамкин уонна «Саха сирин тимир суоллара» АХ генеральнай дириэктэрэ Василий Шимохин илии баттаатылар.

Өрүттэр инвестиционнай бырайыактары олоххо киллэриигэ бииргэ үлэлиир санаалаахтарын биллэрдилэр. Сбербаан хампаанньа инвестиционнай бырайыактарын олоххо киллэрэргэ көмөлөһүө, чуолаан Арассыыйаны уонна Кытайы туоруур кыраныыссаҕа, Дьэлиҥдэ — Мохэ икки ардыгар, Рейново ыстаансыйа сайдыытын хааччыйан туран, судаарыстыба өйөбүлүн дьаһалынан тимир суолу тутууну  үбүлүүр былааннаах.

Ону таһынан баан хампаанньаҕа толору баан өҥөтүн оҥорорго уонна биисинэс-процесстарга көдьүүһү үрдэтэргэ көмөлөһүө диэн «Саха сирин тимир суоллара» АХ пресс-сулууспата иһитиннэрэр.