ВЭФ-2024 дьыалабыай бырагырааматын тиэмэлэринэн сэттэ блокка үллэрдилэр

Илиҥҥи экэнэмиичэскэй пуорум балаҕан ыйын 3-6 күннэригэр Владивостокка Уһук Илиҥҥи федеральнай университет куорпуһун былаһааккатыгар буолуоҕа. Быйылгы пуорум сүрүн тиэмэтэ – «Дальний Восток – 2030. Объединим усилия, создавая возможности».

РФ Бырабыыталыстыбатын бэрэссэдээтэлин солбуйааччы – Уһук Илин федеральнай уокуругар РФ бэрэсидьиэнин боломуочуйалаах бэрэстэбиитэлэ Юрий Трутнев, Арассыыйа Илин диэки болҕомтотун салгыы уурар диэн бэлиэтиир.

“Бу тимир, массыына саҥа суолун, энергетическэй кыаҕы тутууну, Хотугу муора пуордун туһаныыга салгыы хардыылары ирдиир. Уһук Илин сайдыытын дойду баһылыга XXI үйэ национальнай инники турар соругунан биллэрбитэ. Манна анаан кэлин дойду атын сирдэригэр тарҕаныахтаах өйөбүл ураты миэрэлэрэ оҥоһуллаллар, олоххо киирэллэр” – диэн кини этэр.

Илиҥҥи экэнэмиичэскэй пуоруму тэрийээччи – Росконгресс пуонда иһитиннэрбитинэн, дьыалабыай тэрээһини тиэмэлэринэн сэттэ блокка араарбыттар: «Новые контуры международного сотрудничества», «Технологии независимости», «Финансовая система ценностей», «Россия дальневосточная», «Люди, образование и патриотизм», «Транспорт и логистика: новые маршруты» и «Мастер-планы: от архитектуры к экономике».

“Люди, образование и патриотизм” биир сүрүн хайысха талааннаах ыччаты сыһыарар, эрэгийиэннэргэ кинилэр сайдалларыгар, кыахтаах каадыры бэлэмнииргэ, ол иһигэр “Муравьев-Амурскай 2030” бырагыраама көмөтүнэн усулуобуйаны тэрийии, Уһук Илиҥҥэ мэдиссиинэ көмөтүн үрдэтии, оҕо төрөөһүнүгэр усулуобуйа тэрийии, ону тэҥэ, хоту, Сибиир уонна Уһук Илин аҕыйах ахсааннаах норуоттарын үгэстэрин, олохторун укулаатын, креативнай индустрияны чөл хаалларыы буолар.

Муора хотугу пуордун, Уһук Илин авиациятын, транспортнай сырыы уонна муора саҥа хайысхаларын  сайдыытын боппуруостарын «Транспорт и логистика: новые маршруты» хайысха иитинэн ырытыһыахтара.

Илиҥҥи экэнэмиичэскэй пуорум-2024 дьыалабыай бырагырааматын сиһилии бу сигэнэн киирэн көрүөххүтүн сөп: https://forumvostok.ru/programme/business-programme/ .