ВЭФ-2024: Саха сирэ Беларусь өрөспүүбүлүкэтин кытта гуманитарнай, экэнэмиичэскэй сибээстэри сайыннарар

Ил Дархан Айсен Николаев уонна РФ-га Беларусь өрөспүүбүлүкэтин боломуочуйалаах посола Александр Рогожник Илиҥҥи экэнэмиичэскэй пуорум кэмигэр эрэгийиэннэр икки ардыларынааҕы үлэ сайдыытын тула кэпсэттилэр.

Бүтэһик сылларга Саха сирин уонна Беларусь өрөспүүбүлүкэтин икки ардынан атыы-эргиэн кээмэйэ улаатар. Салайааччылар тэрилтэлэ икки ардыларынааҕы дьайыыга сөптөөх усулуобуйалары тэрийиигэ эрэллээхтэрин биллэрдилэр.

Саха сирэ Беларусь оҥорон таһаарар БЕЛАЗ, АМКАДОР, МТЗ, БЕЛАРУСЬ тэрилтэлэри кытта ыкса үлэлэһэр. Манна өссө сөптөөх усулуобуйалар тэриллэллэригэр үлэ ыытыллыаҕа диэн көрсүһүүгэ кэпсэттилэр.

Итиэннэ Айсен Николаев уонна Александр Рогожник санаторнай-куруортнай эмтэнии, Аҕа дойду Улуу сэриитигэр сэбиэскэй норуот хорсун быһыытын киэҥ эйгэҕэ таһаарыыга бииргэ үлэлиир туһунан былааннарын ырыттылар.