ВЭФ-2024: Саха сирин экэниэмикэтигэр креативнай индустрияттан киирэр үп улаатыаҕа

2024 сыл ыам ыйыгар айар индустрия сайдыыта дойду сайдыытын национальнай сыалларын испииһэгэр Арассыыйа Бэрэсидьиэнэ Владимир Путинынан киллэриллибитэ. «О развитии креативных (творческих) индустрий в РФ» саҥа  федеральнай сокуон бу сыл атырдьах ыйын 8 күнүгэр күүһүгэр киирбитэ.

«Саха сиригэр креативнай сектор сайдыыта өссө уон сыллааҕыта саҕаламмыта. 2019  сыллаахха айар индустрия кэнсиэпсийэтин аан бастакынан бигэргэппитэ. Бу үөрэхтээһин экосистимэтин тутарга уонна биисинэс инфраструктуратыгар көмөлөспүтэ. Бу үлэ барыта тирэх тэрилтэнэн — Саха сирин сайыннарар корпорациянан салайыллыбыта», — диэн Айсен Николаев бэлиэтээтэ.

Өрөспүүбүлүкэҕэ креативнай индустрия сайдарыгар материальнай-тиэхиньиичэскэй кыах тэриллибитэ. РФ Бырабыыталыстыбатын бэрэссэдээтэлин солбуйааччы, Уһук Илин Федеральнай уокурук  боломуочуйалаах бэрэстэбиитэлэ Юрий Трутнев  өҥөтүнэн  «Үлэ кыбартаала» креативнай кластер тэриллибитэ. Саха сирин IT пааркатыгар 120 цифровой резидент баар. Маны сэргэ саҥа ювелирнай кластер баар.

Сүрүн болҕомтону ордук федеральнай уонна аан дойду таһымнаах киинэ индустрията ылар.

2023 сылга Саха сирин киинэлэрэ Арассыыйа уонна тас дойду 20% наҕараадаларыгар тиксибиттэрэ. Бу сылга улахан ситиһии саха анимациятыгар кэлбитэ.  2024 сылга номнуо Монголияҕа, Венгрияҕа уонна Казахстаҥҥа үс бирииһи ылбыттара. Былырыын саха киинэтэ прокатка 100 мөл.солкуобайы оҥорбута.

«Бэрэсидьиэн өйөбүлүнэн, Дьокуускайга киинэ оҥорор павильон тутуллуоҕа. Бу Уһук Илиҥҥэ  киинэ сайдыытыгар сүрүн оруолу ылыаҕа. Сылга 24 киинэҕэ тиийэ устарга кыах биэриэҕэ. 2024 сылга  «Кыталыктаах кырдалым» «Сайсары Синема»  хампаанньа устубут киинэтэ Арассыыйа киинэтин бэстибээлигэр арыллыы быһыытынан буолла, – диэн бэлиэтээтэ Айсен Николаев.