ВЭФ-2024: Владимир Путин Өлүөнэ күргэтин тутуу бырайыагын суолтатын бэлиэтээтэ

Өлүөнэ күргэтин тутуу уонна Саха сиригэр олоххо киириэхтээх атын бырайыактар ​​суолталарын Арассыыйа бэрэсидьиэнэ Владимир Путин Илиҥҥи экэнэмиичэскэй пуорумҥа Уһук Илин инфраструктуратын сайыннарыыга туһуламмыт мунньаҕы арыйарыгар бэлиэтээтэ.

Тырааныспар уонна энергетическэй инфраструктура боппуруостара дьүүллэһиллэр тэрээһинигэр Ил Дархан Айсен Николаев кыттыыны ылла.

«Дьокуускай туһаайыытынан күүтүүлээх Өлүөнэ күргэтин тутуу бырайыага олоххо киирэрэ уолдьаста. Буолаары буолан, бу быһаарыллар кыахтаах боппуруоһунан буолла», — диэн Владимир Путин тоһоҕолоон бэлиэтээтэ. Сүрүн быһаарыллар бырайыактарынан маны тэҥэ РФ Бэрэсидьиэнэ Южнай-Якутскай ТЭС-и уонна Саха сиригэр уонна Камчаткаҕа дизель уматыгынан үлэлиир 270 ыстаансыйаны саҥардыы туһунан бэлиэтээтэ.

Өлүөнэ муостата – Саха сиригэр эрэ буолбакка, Арассыыйа Уһук Илин эрэгийиэнигэр тырааныспарынан сибээс  сайдыыта күүһүрэригэр сүҥкэн суолталаах эбийиэк.

Бырайыак өрөспүүбүлүкэ бырабыыталыстыбатын уонна «Ахсыс концессионнай хампаанньа» ХЭУо концессионнай сөбүлэҥнэрин чэрчитинэн олоххо киирэн эрэр. Генеральнай бэдэрээччитинэн «ВИС Строй» ХЭУо буолар.

Бырайыак 2024-2028 сылларга федеральнай бүддьүөттэн 42,8 млрд солкуобай (эбэтэр эбийиэк былааннаммыт сыанатын 33%) суумалаах өйөбүлүнэн 2024-2028 сылларга федеральнай Суол үлэтин былааныгар киирэн, үбүлээһин 2025 сылтан саҕаланыаҕа.