ВЭФ-2024: Владимир Путин Владивостокка Экэниэмикэ пуорумугар кыттыаҕа

Балаҕан ыйын 4-5 күннэригэр Владивостокка буола турар Экэниэмикэ пуорумугар дойду Аҕа баһылыга Владимир Путин кэлэрэ былааннанар. Бу туһунан бэрэсидьиэн пресс-сулууспата иһитиннэрэр.

Бастакы күн Владимир Путин Малайзия премьер-миниистирин Анвар Ибрагимы, Кытай бэрэссэдээтэлин солбуйааччы Хань Чжэны, Сербия бырабыыталыстыбатын бэрэссэдээтэлин солбуйааччы Александр Вулины кытары көрсүөҕэ. Уһук Илин эрэгийиэннэрин сайдыытын, ону тэҥэ урутаан сайдар сирдэр тустарынан мунньах ыытыаҕа. Мунньахха эрэгийиэннэртэн урутаан сайдар сирдэр бэрэстэбиитэллэрэ быһа сибээһинэн кыттыахтара. Бу мунньахтары таһынан Владимир Путин Приморскай кыраай губернаторын Олег Кожемяконы кытары туспа көрсөн кэпсэтиэҕэ.

Иккис күн пуорум саамай улахан тэрээһинэ пленарнай мунньаҕа буолуоҕа. Үгэс курдук, Владимир Путин мунньахха Арассыыйа Азия, Тиихэй акыйаан дойдуларын кытары үлэлэһиитин, Уһук Илин эрэгийиэннэригэр инвестиция киириитин, экэниэмикэлэрин, инфраструктураларын сайдыытын, о.д.а. тирээн турар боппуруостары таарыйыаҕа. Бэрэсидьиэн бу пуорумҥа кэлиэн иннинэ Монголияҕа икки күннээх командировкаҕа сырытта. Онон Арассыыйаҕа, Кытайга, Монголияҕа сыһыаннаах бырайыактар тустарынан эмиэ иһитиннэриэҕэ диэн күүтэбит.