ВЭФ-2024: Юрий Трутнев пуорум түмүгүн бэлиэтээтэ

РФ Бырабыыталыстыбатын Бэрэссэдээтэлин солбуйааччыта – РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев РФ Бэрэсидьиэнин бырабыыталыстыбатын чилиэннэрин кытта Уһук Илиҥҥи экэнэмиичэскэй пуорум түмүктэрин туһунан санаатын тиэртэ.

— Суолталаах тэрээһиҥҥэ Азия-Тиихэй акыйаан эригийиэнин уонна аан дойду атын  сайдыылаах өрүттэрэ киэҥник көрдөрүллүннүлэр. Экэнэмиичэскэй пуорум чэрчитинэн 5 триллион 569,3 млрд солк. суумалаах 313 сөбүлэҥ түһэрсилиннэ. Бу эмиэ бастыҥ түмүк. Былырыын уопсайа 3 триллион 824 млрд солк. суумалаах 386 инвестиционнай дуогабары түһэрсибиппит. Илии баттаммыт дуогабардар 80%-н кэриҥэ  олоххо киирэр инвестиционнай бырайыактарга кубулуйалларын учуоттаан туран,  бу пуорум Уһук Илиҥҥэ уонна Арктикаҕа кырата 4 триллион солкуобай инвестицияны тарта. Ити сөбүлэһиилэр 2030 сылга диэри инвестицияны тардыыга сыалы-соругу 12 триллион солкуобайга диэри үрдэтэр туһунан этиини киллэрэргэ кыах биэрдилэр.

Тэрээһин саамай улахан бырайыактарынан: Воркута химическэй комплексын тутуу, Амур уобалаһыгар Кун-Манье никель-алтан хостонор сирин сайыннарыы, Забайкальеҕа Березовскай тимир рудата хостонор  кыамтатын кэҥэтии, Еврейскэй автономнай уобалас Нижнеленинскэй-Тунцзян туоруур муостатын аттыгар «Союз» тимир суол тиэйэр-таһар комплексын тутуу, Хабаровскай кыраайга углеводороднай гааһы тиэйэр муора терминалын тутуу буоллулар. 2030 сылга диэри Уһук Илин эригийиэн олохтоохторугар 2% ипотека ставкатын оннунан хаалларыы, уокурук куораттарыгар генеральнай былааннары олоххо киллэриигэ эбии 100 млрд. солкуобайы көрүү, 2030 сылга диэри Уһук Илин эригийиэннэригэр энергетическэй бырагыраама сайдыытын түргэтэтии, хааччыйыы курдук боппуруостары быһаарыахпыт. Маны тэҥэ, федеральнай уокурукка оҕо төрөөһүнүн орто көрдөрүүттэн намыһах элбэх оҕолоох дьиэ кэргэттэргэ 1 мөлүйүөн солкуобай төлөбүр, «Байкал» сөмөлүөтү оҥорон таһаарыы үлэтин түмүктээһин уонна да атын суолталаах быһаарыыга турар боппуруос үгүс.

Көстөрүн курдук, ытыктабыллаах Владимир Владимирович, IX Илиҥҥи экэнэмиичэскэй пуорум саамай сүрүн түмүгэ – Уһук Илиҥҥи федеральнай уокурук салгыы балысханнык сайдарыгар усулуобуйаны үөскэтиигэ эн соруйбут соруккун сөптөөхтүк кэмигэр быһаарыы уонна олоххо киллэрии буолар. Арассыыйа Уһук Илин эрэгийиэннэрин сайдыытыгар тус болҕомтоҕутун уураргар махтанабын, — диэн бэлиэтээтэ Юрий Трутнев түмүк мунньахха.