ВЭФ-2025: 6,5 трлн солк. суумалаах 358 сөбүлэһии түһэрсилиннэ

Илиҥҥи экэнэмиичэскэй пуорумҥа 6 триллион 58,2 миллиард солкуобай суумалаах 358 сөбүлэһии түһэрсилиннэ. Бу туһунан РФ Бырабыыталыстыбатын бэрэссэдээтэлин солбуйааччы – РФ Бэрэсидьиэнин Уһук Илин федеральнай уокурук боломуочуйалаах бэрэстэбиитэлэ Юрий Трутнев пресс-сулууспата иһитиннэрдэ.

«Быйыл үбүлүөйдээх, онус Илиҥҥи экэнэмиичэскэй пуорум буолан ааста. Пуорумҥа 6 триллион 58,2 миллиард солкуобай суумалаах 358 сөбүлэһии түһэрсилиннэ. Ол эрээри, сүрүнэ ити буолбатах. Пуорум ааспыт уон сыллааҕы үлэ түмүгүн таһаарар сиринэн буолла. РФ Бэрэсидьиэнэ Владимир Владимирович Путин сорудаҕынан биһиги Уһук Илин сайдыытын, дойдубут туһугар үлэбитин салгыыбыт. Дьон туһанар социальнай бырагыраамалара, экэниэмикэни көҕүлүүр уонна инвестордары тардар мэхэньииһимнэр үлэлиир буоллулар. Бэрэсидьиэн биэрбит сорудахтара толоруллуохтара», – диэтэ Трутнев.

Саха сирэ уопсайа 106 миллиард солкуобай суумалаах 27 сөбүлэһиигэ илии баттаата. «Сөбүлэһиилэр былааннара 100% толорулунна. 27 сөбүлэһиини түһэрсии былааннаммыта, барыта илии баттанна, инвестиция уопсай суумата 106 миллиард солкуобай буолла», – диэн Саха сирин Ил Дархана Айсен Николаев эрдэ иһитиннэрбитэ.