ВЭФ-2025: Черскэй бөһүөлэгэр автономнай гибриднэй энергокомплекс үлэҕэ киирдэ

«РусГидро» хампаанньа Черскэй бөһүөлэгэр 9,3 МВт кыамталаах автономнай гибриднэй энергокомплексы (АГЭК) үлэҕэ киллэрдэ.

Саҥа комплексы үлэҕэ киллэрэр тэрээһин Илиҥҥи экэнэмиичэскэй пуорум былаһааккатыгар телемост нөҥүө ыытылынна. Бу туһунан sakha.gov.ru иһитиннэрэр.

Үөрүүлээх тэрээһиҥҥэ РФ Энергетикатын миниистирэ Сергей Цивилев, СӨ Ил Дархана Айсен Николаев, «РусГидро» ААУо Бырабылыанньатын бэрэссэдээтэлэ – генеральнай дириэктэрэ Виктор Хмарин, «Арктик Пауэр Кэпитал» ХЭУо генеральнай дириэктэрэ Владимир Тощенко кытыннылар.

Энергетика миниистирэ Сергей Цивилев бырайыак ситиһиилээхтик олоххо киллэрии холобурунан буолбутун бэлиэтээтэ.

«Биһиги энергетиканы сайыннарар бырагыраамабытынан сүрүн чааһынан электрогенерация буолар. Бүгүн биһиги бу бырагыраама дьиҥнээхтик олоххо киириитин холобурун көрөбүт. Алта уонус сылларга тутуллубут, 200-тэн тахса килэмиэтирдээх, мас остуолбалардаах, энергияны биэриигэ улахан сүтүктээх салгын лииньийэлэрэ саҥа, аныгылыы систиэмэнэн солбулуннулар. Инникибит ордук чуолаан уот ситимиттэн араарыллыбыт сирдэринэн уонна Уһук Илиҥҥэ сытар. Онон бу бырагырааманы ситиһиилээхтик толорбуккутунан барыгытын эҕэрдэлиибин. Салгыы биһиги маны  кэҥэтэн уонна өйөөн иһиэхпит. Бырагыраама бары кыттыылаахтарыгар махтал», — диэн Сергей Цивилёв эттэ.

СӨ Ил Дархана Айсен Николаев эрэгийиэн олохтоохторугар ыстаансыйа үлэҕэ киириитин улахан суолталааҕын бэлиэтээтэ. «Чахчы — Черскэйгэ олус үөрүүлээх түгэн. Сергей Евгеньевич эппитин курдук, электроэнергиянан хааччыйар салгын лииньийэтэ эргэ этэ, ол түмүгэр уот улаханнык сүтэрэ уонна мэлдьи саахал тахсара, өрүс пордун үлэтигэр мэһэйдиирэ, ити биллэн турар, дьон олоҕун хаачыстыбатыгар дьайара. „РусГидро“ уонна  „Арктик Пауэр“ холбоһуктарын түмүгэр аныгылыы энергокомплекс баар буолла», — диэн Айсен Николаев эттэ.