ВЭФ-2025 дьыалабыай тэрээһиннэрэ алта блокка арахсар

Илиҥҥи экэнэмиичэскэй пуорум официальнай саайтыгар дьыалабыай бырагыраамата бэчээттэннэ. Бу пуорум балаҕан ыйын 3-6 күннэригэр Владивостокка буолуоҕа.

Быйылгы пуорум сүрүн тиэмэтэ: «Уһук Илин – эйэ уонна чэчирии сайдыы туһугар бииргэ үлэлээһин». Тэрийээччи – Росконгресс пуондата.

«Быйыл онус үбүлүөйдээх Илиҥҥи экэнэмиичэскэй пуорум ыытыллар. Пуорумҥа үгэс быһыытынан, туох ситиһиллибитин түмүктэрин таһаарыахпыт, экэниэмикэни сайыннарарга уонна уһук илиннээҕи олохтоохтор олохторун хаачыстыбатын тупсарарга өссө ханнык мэхэньииһимнэри оҥоруохха наадатын ырытыахпыт, ону тэҥэ уһун болдьохтоох былааннары туруоруохпут. Уһук Илин түргэтэтиллибит социальнай-экэнмиичэскэйй сайдыытын мэктиэтинэн РФ Бэрэсидьиэнэ Владимир  Путин өйөбүлэ, кини макрорегион иннигэр турар соруктар бастакы уочараттаахтарын көрүүтэ буолар.

Уһук Илин уокурук сайдыыта дойду баһылыгынан XXI үйэ тухары национальнай сүрүн соргунунан биллэриллибитэ. Биһиги дойду баһылыга иннибитигэр туруорар соруктарын толорорго бары кыаллары оҥоруохпут. Манна пуорум көмөлөһөр. Экэниэмикэ араас өрүттэрин, инвестициялары тардыыны, социальнай эйгэни бастыҥ инвестордары, биисинэс уонна былаас уорганнарын бэрэстэбиитэллэрин кытта ырытарга аан дойду таһымнаах былаһааккатынан буолла.

Пуорумҥа үгэс быһыытынан тас дойдулардааҕы партнердарбытын кэтэһэбит уонна кинилэри кытта бииргэ үлэлээһини бөҕөргөтөргө бэлэммит», – диэтэ РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ,Илиҥҥи экэнэмиичэскэй пуорум тэрийэр кэмитиэтин бэрэссэдээтэлэ Юрий Трутнев.

ВЭФ-2025 дьыалабыай тэрээһиннэрэ алта тематическай блокка арахсар:

1.  «Уһук Илин – олоххо уонна сайдыыга аналлаах сир»;
2. «Үүнүү ырысыаптара: инвестиция, инновация, интеграция»
3. «Аһаҕас буолуу уонна бэйэ-бэйэҕэ туһалаах партнердаһыы – бигэ турук олоҕо»;
4. «Технологиялар: теорияттан экэнэмиичэскэй көдьүүскэ»;
5. «Куораттар – дьон олоҕор»;
6. «Сайдыы тымырдара: логистика экономиканы хайдах уларытарый?».

Ону таһынан пуорум чэрчитинэн Креативнай индустриялар пуорумнара, «День сокола» норуоттар икки ардыларынааҕы пуорум, «Кэскил күнэ» ыччат пуорума, үрдүк үөрэх эйгэтигэр бииргэ үлэлээһиҥҥэ АТЭС норуоттар икки ардыларынааҕы кэмпириэнсийэтэ уонна Арассыыйатааҕы историческай уопсастыба кэмпириэнсийэтэыытыллыахтара. Маны таһынан, бырагыраамаҕа Кытайы, Индияны, Таиланы, Мьянманы уонна АСЕАН-ы кытта биисинэс-диалогтар киириэхтэрэ. Уһук Илиҥҥи федеральнай уокурук эрэгийиэннэрэ бэйэлэрин ситиһиилэрин балаҕан ыйын 3-9 күннэригэр ыытыллар «Уһук Илин уулуссата» быыстапкаҕа көрдөрүөхтэрэ.