«ВЭФ-2025» пуорумҥа алта тыһыынча кэриҥэ киһи кыттыаҕа

Үбүлүөйдээх онус Илиҥҥи экэнэмиичэскэй пуорумҥа алта тыһыынча кэриҥэ киһи кыттыаҕа.

«ВЭФ Уһук Илин сайдыытыгар күүстээх төһүү буолар, Уһук Илиҥҥи эрэгийиэннэргэ саҥа инвестиционнай бырайыактар киирэллэр. Урутаан сайдар сирдэр, «Гектар» бырагыраама, чэпчэтиилээх ипотека уонна куораттары сайыннарыы маастар-былааннара чуолаан Уһук Илинтэн саҕаламмыттара. Уһук Илин олохтоохторо уларыйыылары билэллэр. Саҥа тэрилтэлэр, аэропортар тутуллаллар, үлэ миэстэлэрэ тахсаллар. Өссө да оҥоруллуохтаах үлэ элбэҕэ чахчы. Бэрэсидьиэн сорудаҕын толорор үлэни салгыы, биһиги бүгүн Уһук Илин ураты суолталааҕын чуолкай өйдүөхтээхпит. Пуорум Арассыыйа уонна Азия-Чуумпу акыйаан эрэгийиэнин дойдуларын ырыынактарыгар транзитнай сиринэн буолар», – диэн ВЭФ тэрийэр кэмитиэтин мунньаҕар РФ Бырабыыталыстыбатын бэрэссэдээтэлин солбуйааччы – РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев бэлиэтээтэ.

Пуорум сүрүн тиэмэтэ: «Уһук Илин – эйэ уонна чэчирии сайдыы туһугар бииргэ үлэлээһин». Киэҥ ис хоһоонноох дьыалабыай бырагыраама билиҥҥи түмүктэри чиҥэтиигэ туһуланыаҕа уонна макроэрэгийиэҥҥэ кэлэр кэминээҕи экэниэмикэ кэскиллээх хайысхаларын быһаарарга кыах биэриэҕэ. Ону таһынан, пуорум чэрчитинэн ДВФУ сүрүн куорпуһугар «Уһук Илиҥҥэ нөрүөн нөргүй!» диэн федеральнай судаарыстыбаннай былаас уорганнарын быыстапката ыытыллыаҕа. Үгэс быһыытынан «Уһук Илин уулуссата» быыстапка арыллыаҕа. Уһук Илиҥҥи бары уон биир эрэгийиэнэ бэйэлэрин павильоннарын туруоруохтара.

«Саҥа инвестиционнай бырайыактары олоххо киллэрии түмүгэр биһиги Уһук Илиҥҥэ Арассыыйа Федерациятын атын сирдэригэр холоотоххо, үрдүк экэнэмиичэскэй үүнүүнү хааччыйдыбыт. Маны мин олус суолталааҕынан ааҕабын. Биһиги сорукпут – быйыл уон сыллаах үлэбит түмүгэ таһаарыллар Илиҥҥи экэнэмиичэскэй пуорума үрдүк таһымнаахтык ааһарын ситиһии», – диэн Юрий Трутнев мунньаҕы түмүктээтэ.