ВЭФ-2025: Саха сирэ уонна «ОКТО» бөлөх бииргэ үлэлээһини кэҥэтэллэр

Балаҕан ыйын 3 күнүгэр Илиҥҥи экэнэмиичэскэй пуорумҥа СӨ Ил Дархана Айсен Николаев уонна «ОКТО» бөлөх генеральнай дириэктэрэ Александр Тузенко «ОКТО Золото» АУ-ны кытта социальнай-экэнэмиичэскэй сайдыыга бииргэ үлэлэһэр туһунан сөбүлэҥҥэ илии баттастылар. Бу туһунан sakha.gov.ru иһитиннэрэр.

«ОКТО» бөлөх бас билээччитэ Дмитрий Толоконниковтыын уонна генеральнай дириэктэр Александр Тузенколыын көрсүһүүгэ сүрүн тиэмэлэринэн Саха сирин экэниэмикэтин сайыннарар уонна инвестицияны тардар бырайыактар, ону таһынан социальнай, үөрэх, доруобуйа харыстабылын уонна экология эйгэтигэр бииргэ олоххо киллэрэр бырагыраамалар буоллулар. Ону таһынан, өрүттэр каадыры бэлэмнээһин, оҥорон таһаарар кыамталары саҥардыы уонна айылҕа харыстабылыгар технологиялары киллэрии боппуруостарын дьүүллэстилэр.

«OKTO Золото» хампаанньа быйыл муус устар ыйга Саха сиригэр, Забайкальеҕа уонна Бурятияҕa сиртэн хостонор баайдаах «Западная» хайа-уруудатын хостуур хампаанньатын атыыласпыта. Бигэргэтиллибит күндү металл саппааһа 90 туоннаттан, оттон ресурсата 390 туоннаттан тахса. Сылга үс туоннаттан тахса көмүһү хостууллар. Хампаанньа 13 бырайыагы олоххо киллэрэр, онтон уонугар билиҥҥи туругунан геологическай-чинчийэр үлэлэр ыытыллаллар.

Санатан эттэххэ, Илиҥҥи экэнэмиичэскэй пуорум – Уһук Илин экэнэмиэкэтин сайыннарар уонна Азия-Чуумпу акыйаан эрэгийиэнигэр норуоттар икки ардыларынааҕы бииргэ үлэлээһини кэҥэтэр сүрүн былаһаакканан буолар. Пуорум Владивостокка балаҕан ыйын 3-6 күннэригэр ыытыллар. Сүрүн тиэмэтэ: «Уһук Илин — эйэ уонна чэчирии сайдыы туһугар бииргэ үлэлээһин». Тэрийээччи — Росконгресс пуондата.