ВЭФ-2025: Саха сирин салалтата байыастар дьиэ кэргэттэригэр социальнай өйөбүл миэрэлэрин кэҥэтэр

СӨ Бырабыыталыстыбата  байыаннай дьайыы кыттыылаахтарыгар – байыаннай сулууспалаахтарга уонна кинилэр дьиэ кэргэттэригэр социальнай өйөбүл миэрэлэрин күүһүрдүүнү салгыыр. Бу боппуруос Илиҥҥи экэнэмиичэскэй пуорум  чэрчитинэн СӨ Бырабыыталыстыбатын Бэрэссэдээтэлэ Кирилл Бычков уонна РФ Оборуонатын миниистирин солбуйааччытынан – статс-сэкирэтээринэн Анна Цивилеваны кытта мунньахтарыгар сүрүн тиэмэнэн буолла.

«Биһиги байыастарбыт дьиэ кэргэттэрэ дойду кыһамньытын уонна болҕомтотун билэллэрин туһугар барытын оҥоруохтаахпыт. Өйөбүл бириэмэтигэр уонна чопчу аадырыһынан оҥоһуллуохтаах», — диэн Бырабыыталыстыба бэрэссэдээтэлэ эттэ. Мунньахха ону таһынан байыаннай сулууспалаахтары сэбинэн-сэбиргэлинэн уонна тиэхиньикэнэн хааччыйыы боппуруостара көрүлүннүлэр.

«Бүгүн Саха сирэ буойуннары тиэхиньикэнэн уонна тэрилинэн хааччыйыыттан саҕалаан, доруобуйаларын чөлүгэр түһэриигэ уонна үлэнэн хааччыйыыга тиийэ – бары хайысхаларынан үлэни систиэмэлээхтик туруорар. Биир да байыас, биир да дьиэ кэргэн болҕомтото суох хаалбатын туһугар биһиги социальнай миэрэлэри салгыы кэҥэтэ туруохпут», — диэн Кирилл Бычков эбэн эттэ.

Итини таһынан, сураҕа суох сүппүт байыаннай сулууспалаахтары көрдөөһүн уонна кинилэр дьиэ кэргэттэрин кытта үлэ боппуруостара туспа дьүүллэһилиннилэр. Өрөспүүбүлүкэ ДНК-нан быһаарыы процедураларын судургутутууну уонна федеральнай биэдэмистибэлэр икки ардыларыгар дааннайдары атастаһыыны чэпчэтэри ситиһэр. Мунньахха өссө Донецкай Норуодунай Өрөспүүбүлүкэтин Докучаевскай куоратыгар чөлүгэр түһэрии үлэлэрин хаамыыта көрүлүннэ. Онно Саха сирэ шефствонан социальнай уонна үөрэх эбийиэктэрин өрөмүөннүүр, куорат инфраструктуратын тупсарар. Анна Цивилева Саха сирин үлэтигэр үрдүк сыанабылы биэрдэ.