ВЭФ-2025: Сбер уонна Саха Өрөспүүбүлүкэтэ цифровой уонна үөрэхтээһин бырайыактарыгар бииргэ үлэлиири дьүүллэстилэр

Илиҥҥи экэнэмиичэскэй пуорумҥа цифровой трансформацияҕа, үөрэхтээһиҥҥэ холбоһуктаах бырайыактары олоххо киллэрии, Оҥоһуу өй лабаратыарыйатын үлэтин, онтон да атын инновационнай технологиялары сайыннарыы боппуруостарын  Ил Дархан Айсен Николаев уонна Сбербаан бырабылыанньатын Бэрэссэдээтэлэ, Бэрэсидьиэнэ Герман Греф дьүүллэстилэр.

«Сберы кытта бииргэ үлэлээн, IT-индустрия сайдыытыгар, ол иһигэр оҥоһуу өйү олоххо киллэриигэ куһаҕана суох түмүктэри ситистибит. 2024 сыллаахха Сберы кытта бииргэ арыйбыт Оҥоһуу өй лабаратыарыйата олохтоох дьоҥҥо уонна урбаанньыттарга инновационнай быһаарыылары олоххо киллэрэргэ көмөлөһөр. Лабаратыарыйа оҥоһуу өй  эйгэтигэр бырайыактары уонна олохтоох разработчиктары көхтөөхтүк өйүүр. Ол курдук социальнай-экэнэмиичэскэй соруктары толорор сэттэ бырайыакка көмөлөстө. Ол иһигэр – саха тылын цифровой “двойнига” уонна былаас  23 уорганыгар, 200-тэн тахса муниципалитекка киллэриллибит “Обращайся” цифровой юрист баар буоллулар. Бырайыак Сбер GigaChat-тын оҥоһуу өйүн базатыгар оҥоһуллубут буолан, ыйыттахха түргэнник эппиэттиир, тиэкистэри түргэнник толорор, былаас, олохтоох салайыныы үлэтин көдьүүһүн үрдэтэр”, — диэн эттэ Айсен Николаев.

Ил Дархан, Илиҥҥи экэнэмиичэскэй пуорум буолаары турдаҕына, Сбер Дьокуускайга улахан мастары олордор кыахтаах тиэхиньикэни бэлэхтээбитин эттэ.

Көрсүһүүгэ “Школа21” бырайыагы сайыннарыыны, Оҥоһуу өй лабаратыарыйатын үлэтин  дьүүллэстилэр.

Айсен Николаев уонна Герман Греф Москваҕа сэтинньи 19-21 күннэригэр ыытыллыахтаах AI Journey аан дойдутааҕы кэмпэриэнсийэҕэ кыттар туһунан дуогабардастылар.

Өрүттэр маны тэҥэ Өлүөнэ муостатын тутуу үбүлээһинин дьүүллэстилэр, диэн иһитиннэрэр Ил Дархан, бырабыыталыстыба пресс-сулууспата.

Сиһилии: https://www.sakha.gov.ru/news/11347