ВЭФ-2025: Wildberries & Russ Саха сиригэр аныгы ыскылаат комплексын тутар былааннаах

Илиҥҥи экэнэмиичэскэй пуорумҥа СӨ Ил Дархана Айсен Николаев уонна «РВБ» ХЭУ генеральнай дириэктэрэ Татьяна Ким өрөспүүбүлүкэҕэ ыскылаат комплексын тутуу инвестиционнай бырайыагын олоххо киллэрии боппуруостарын дьүүллэстилэр. Бу туһунан sakha.gov.ru суруйар.

«РВБ» хампаанньа Дьокуускай куоракка 30 тыһыынча кв. миэтэрэттэн тахса иэннээх ыскылаат комплексын тутар былааннаах. Бырайыакка 1,8 млрд солкуобай үп-харчы угуллуоҕа уонна 900 саҥа үлэ миэстэтэ тахсыаҕа. Айсен Николаев бырайыагы өйөөтө уонна хампаанньа эрэгийиэн атыы-эргиэн инфраструктуратын сайыннарыыга угар үбэ-харчыт өрөспүүбүлүкэ олохтоохторугар наадалаах киэҥ ассортименнаах табаардары тиэрдиини түргэтэтиэҕэ, саҥа үлэ миэстэлэрэ ыскылаат комплексыгар эрэ буолбакка, хампаанньа ситимэ өрөспүүбүлүкэ үрдүнэн кэҥиирин суотугар эмиэ тахсыахтара диэн бэлиэтээтэ.

Өрүттэр олохтоох оҥорон таһаарааччылар табаардарын тарҕатар сыалтан маркетплейска «Саха сиригэр оҥоһулунна» диэн эрэгийиэннээҕи бородууксуйа салаатын арыйар кыаҕы, ону таһынан Саха сирин «Мода бырагыраамата: мааркалар, фабрикалар, ритейл» акселератор кыайыылаахтарыгар кэлиэксийэлэрин таһаарарга чэпчэтиилэри биэрэри эмиэ кэпсэттилэр. 2024 сыллаахха үлэлээбит бырагыраама саха брендтэрэ – таҥас-сап уонна ювелирнай оҥоһуктар дойду уонна аан дойду ырыынактарыгар тахсалларыгар, бөдөҥ атыы-эргиэн ситимнэрин уонна онлайн-былаһааккалары кытта бииргэ үлэлэһэллэригэр көмөлөһөр.

Пуорум былаһааккатыгар буолбут көрсүһүү кэнниттэн Саха сирин Бырабыыталыстыбата уонна «РВБ» хампаанньа (Wildberries & Russ холбоһуктаах хампаанньата) өрөспүүбүлүкэ сиригэр-уотугар инвестиционнай бырайыагы олоххо киллэрэр туһунан сөбүлэҥҥэ илии баттастылар. Докумуоҥҥа Саха сирин Ил Дархана Айсен Николаев уонна Wildberries төрүттээччитэ, «РВБ» баһылыга Татьяна Ким илии баттаатылар.

«Биһиги бу инвестиционнай бырайыагы өйүүбүт. Хампаанньа өҥөтүнэн үгүс киһи туһанар, туһанааччы ахсаана үксээн иһэр, пууннарын ситимэ куораттарга эрэ буолбакка, ыраах нэһилиэктэргэ тиийэ кэҥиир. Ол иһин саҥа логистическай киин тэриллиитэ дьоҥҥо наадалаах табаардар ордук табыгастаах буолалларыгар кыах биэриэҕэ. Хампаанньа үбэ-харчыта олохтоох нэһилиэнньэ олоҕун хаачыстыбатыгар үтүө сабыдыалы оҥоруоҕа», – диэн СӨ Ил Дархана Айсен Николаев бэлиэтээтэ.

«Саха Өрөспүүбүлүкэтэ – ураты килиимэттээх уонна географическай усулуобуйалаах эрэгийиэн буоларын быһыытынан, бөдөҥ бырайыактары ситиһиилээхтик олоххо киллэрэргэ кыһаллан былааннааһыны, инновационнай технологиялары киллэриини уонна элбэх ресурсаны эрэйэр. Биһиги маннык ыарахаттары көрсөргө уонна саҥа үрдэллэри дабайарга, тырааныспар ситимэ тиийимтиэтин үрдэтэр уонна табаар эргиирин тупсарар туһугар бэлэммит. Ол курдук, логистическай киини тутар туһунан быһаарыы ылыллыбыта. Бу киин эрэгийиэн уратытын учуоттаан, таһаҕаһы тиэрдиини тупсарыыга сүрүн хардыынан буолуоҕа. Табаары тиэрдии болдьоҕун биллэрдик кылгатарга уонна сыанатын түһэрэргэ кыах биэриэҕэ. Саха Өрөспүүбүлүкэтин Уһук Илиҥҥэ суолталаах тырааныспар уонна экэнэмиичэкэй киин быһыытынан балаһыанньатын бөҕөргөтүөҕэ, бүтүн эрэгийиэн бигэ туруктаах сайдыытыгар табыгастаах усулуобуйаны үөскэтиэҕэ», – диэн Wildberries төрүттээччитэ, «РВБ» баһылыга Татьяна Ким эттэ.