Вера Прокопьева-Итэҕэл: “Таптыыбын…”

Бу дьыл кулун тутар 15 күнүгэр Мукучуга “Дайан” сынньалаҥ киинин үлэһитэ Вера Николаевна Прокопьева-Итэҕэл  ойор-тэбэр оҕо сааһын оскуолатын бүтэрбитэ 30, култуура эйгэтигэр үлэлээбитэ 30, “Күндү ийэкээм” хоһоонугар ырыа айыллан бар дьоҥҥо ылламмыта 20 сылынан, “Таптыыбын” диэн ааттаах хоһоонун хомуурунньуга тахсыбыт үөрүүлээх дьоро киэһэтэ үрдүк таһымнаахтык ааста.

Кини 1978 с. I Лүүчүн нэһилиэгэр элбэх оҕолоох Прокопьевтар дьиэ кэргэннэригэр сэттис оҕонон төрөөбүтэ. Ийэтэ Вера Алексеевна, аҕата Николай Михайлович устар күн өрөөн олорбот, дьиҥ-чахчы үлэни өрө туппут сүөһү, сылгы иитэр саха дьоһун ыала этэ. Ыччаттара билигин да дьонноруттан хаалбыты барытын чөкө тутан олороллор. Дьэ субу курдук истиҥ сахалыы эйгэҕэ улааппыт Вера кыыс Бүлүүгэ иистэнньэҥ үөрэҕин, Нам педучилищетын, салгыы Култуура уонна искусство Арктикатааҕы институтун бүтэрбитэ. Билигин Мукучуга А.П. Николаев аатынан “Дайан” норуот айымньытын дьиэтигэр уус-уран салайааччынан үлэлиир. СӨ култууратын туйгуна.

Хоһоонноро, ыстатыйалара, кэпсээннэрэ улууспут “Дабаан” хаһыатыгар, ulus-media ситимҥэ, өрөспүүбүлүкэ “Киин куорат”, “Кыым” хаһыаттарыгар, “Далбар Хотун”, “Чолбон”, “Алмазкредитсервис” сурунаалларга, араас хомуурунньуктарга бэчээттэммиттэрэ. Уонча хоһоонун мелодистар Роман Степанов, Петр Азаров, Иван Туласынов ырыа гынан көтүппүттэрэ.

Айар дьоро киэһэтэ “Иэйии” үҥкүүттэн (үҥкүүһүт Афанасьева В.Г.) ааптар хоһооннорун ааҕыытыттан, бэйэтин туһугар олус истиҥ композияциянан саҕаланна.

Бу киэһэҕэ Бүлүү куоратыттан СӨ култууратын үтүөлээх үлэһитэ Ольга Корякина салайааччылаах “Ай-ыллаа” вокальнай ансаамбыл, ырыаһыттар — СӨ култууратын туйгуннара Нина Боронова, Анастасия Николаева,  Марианна Иванова, Платонов Виктор Николаевич, СӨ транспорын Бочуоттаах үлэһитэ, Бүлүү улууһун Бочуоттаах олохтооҕо, Бүлүү улууһун холбоһуктаах норуодунай хорун ырыаһыта, музыкана кыттыыны ыллылар. Мукучуттан “Кырдал” айар түмсүү (сал. Павлова А.С.-Арыпыана), “Айыллаана” ырыа ансаамбыла (сал. Макарова А.Г.), “Дэриэбинэчээн” норуодунай театр (реж. С.Е.Иванова) кытыннылар.

Итэҕэл тылларыгар суруллубут “Күндү ийэкээм” 2005 сылтан өрөспүүбүлүкэтээҕи “Ырыа – дууһам иэйиитэ” ырыа куонкуруһун гиимнэ буолбут ырыаны, атын да ырыалары “Ай-ыллаа” вокальнай ансаамбыл үрдүк таһымҥа толордо. Музыкант В.Н. Платонов электробаяҥҥа А.Бабаджанян “Лунная серенада”, А.Алексеев “Күһүҥҥү серенада”, фонограмманы кытта “Тополя” композицияны толорбута дохсун ытыс тыаһынан биһирэннэ.

Бииргэ үөрэммит доҕотторун аатыттан II Лүүчүнтэн Сардаана Жакипова чаҕылхай ырыатынан эҕэрдэтин анаата.

Хоһоонньут тылларыгар олохтоох ырыаһыттар: “Эҕэрдэ, эһиэхэ бар дьоммор!”, Иван Тулааһынан дьүрүлүгэр (Ирина Находкина), “Көмүс таммах буоламмын”, Петр Азаров дьүрүлүгэр (Айталина Макарова), “Хаар үҥкүүтэ”, Иван Тулааһынап дьүрүлүгэр (Клементина Каримова) толордулар. Үтүө дьоро киэһэни “Дэриэбинэчээн” народнай театр артыыстара (режиссер С.Е.Иванова) көрдөөх үҥкүүлэринэн, сыаҥкаларынан киэргэттилэр.

Дьоро киэһэ туох баар тэрээһинигэр кыыһа Лия Васильевна, күтүөтэ Илья Андреевич Осиповтар, чугас дьоно  ис сүрэхтэриттэн кыһаллан күүс-көмө буоллулар.

Айар дьоро киэһэтинэн Вера Николаевнаны олохтоох дьаһалта, үлэлиир тэрилтэтэ, ансаамбыллар, айар түмсүүлэр, Бүлүү куоратыттан ырыаһыт ымыылаах доҕотторо, олорор түөлбэтэ, бииргэ үөрэммит доҕотторо, кылааһын салайааччыта Т.С. Павлова, аймах-билэ чугас дьоно  эҕэрдэлээтилэр.

Күндү Вера Николаевна, эн айар үлэҕэ дьиҥ сахалыы ис кутуҥ, айылҕаттан бэриллибит дьоҕуруҥ, сахалыы номоҕон дьүһүнүҥ,быһыыҥ-таһааҥ, үлэҕэ дьулууруҥ барыта түмүллэн – ыытааччы, хоһоонньут, тэрийээччи, сценарист, драмартыыска быһыытынан киэҥник билинниҥ, бар дьонуҥ биһирэбилин ыллыҥ. Онтон биһиги эмиэ олус үөрэбит, астынабыт, киэн туттабыт!

Субу курдук куруутун үөрүү – көтүү үктэллээх, дьол-соргу доҕуһуоллаах этэҥҥэ доруобайдык сырыт – диэн алгыс баһын сыалыыбыт!

Ксения Новикова, Мукучу.