Верхоянскайга 22 киһи босхо түҥэтиллибит шаурманан сүһүрбүт

Верхоянскай куоракка биллибэт этиологиялаах оһоҕос инфекциятынан хас да киһи сүһүрбүт.

Саха сиринээҕи Роспотребнадзор управлениетыгар иһитиннэрбиттэринэн, ыарыы тарҕаныыта бырааһынньык кэмигэр босхо түҥэтиллибит шаурманы кытта сибээстээх. Барыта 22 киһи эмсэҕэлээбит, кинилэр туруктара ортонон сыаналаналлар.

«22 эмсэҕэлээбиттэргэ барыларыгар мэдиссиинэ көмөтө уонна көрүүтэ тэрилиннэ. Ыарыһахтар туруктара ортонон сыаналанар», — диэн Роспотребнадзор Саха сиринээҕи управлениетыгар бэлиэтээтилэр.

Билигин санитарнай-эпидемиологическай силиэстийэ үлэтэ ыытыллар. Исписэлиистэр ыарыы чуолкай төрүөтүн быһаараллар. Бу түбэлтэ Саха сиринээҕи Роспотребнадзор управлениетын хонтуруолугар ылылынна.