ГТРК «Саха» үлэһиттэрин 20 сыллаах үбүлүөйүнэн эҕэрдэлээтилэр

Өрөспүүбүлүкэтээҕи медиа-кииҥҥэ ГТРК «Саха» 20 сыллаах үбүлүөйүгэр анаммыт үөрүүлээх киэһэ буолан ааста. Бу туһунан ЯСИА суруйар.

ЯСИА иһитиннэрэринэн, үлэһиттэр Саха сирин олохтоохторун туһугар килбиэннээх үлэлэрин иһин махтал тыллары иһиттилэр.

«Бу – Саха сирин уопсастыбаннай олоҕор сыаната суох кылааты киллэрбит улахан, үрдүк профессиональнай таһымнаах хамаанда. ГТРК «Саха» өрөспүүбүлүкэ информационнай эйгэтин тэрийиигэ, Саха сирин олохтоохторун туһугар күн аайы үлэлээн, олус улахан үлэни толордо. Бу бүтүн эрэгийиэҥҥэ олус суолталаах уонна наадалаах үлэ», — диэн Саха Өрөспүүбүлүкэтин Инновацияҕа, сыыппара сайдыытыгар уонна инфокоммуникационнай технологияларга миниистирэ Петр Николаев эттэ.

Хампаанньа үлэһиттэригэр саха эстрадатын ырыалара толорулуннулар уонна наҕараадалар туттарылыннылар.

«Бу 20 сыл иһигэр биһиги улахан суолу аастыбыт уонна сороҕор маннык буолбута итэҕэллибэт да курдук. Мин бэйэлэрин дьыалаларыгар бэриниилээх үлэһиттэрбитигэр, кэлэктииппитигэр олус махтанабын. Кинилэр күнүһүн-түүнүн үлэлээн, биһиги көрөөччүбүт туһугар кыһаллаллар, сонуннары көрдүүллэр, түргэнник уонна итэҕэтиилээхтик көрөөччүгэ тиэрдэллэр. Бу биһиэхэ суолталаах күн, тоҕо диэтэххэ 20 сыл – бу саҕаланыыта эрэ», — диэтэ ГТРК «Саха» филиалын дириэктэрэ Ирина Гоголева.

ГТРК — аан дойдуга биир саамай бөдөҥ медиахолдингынан буолар. Хампаанньа Арассыыйа хас биирдии эрэгийиэнигэр 89 филиаллаах. Саха сиригэр ГТРК филиала 2005 сыллаахха тэриллибитэ. Билиҥҥи кэмҥэ ГТРК «Саха» «Россия 1» телеханаалга «Вести Саха»  информационнай биэриини, сахалыы уонна нууччалыы тылынан тахсар «Вести Саха. Нэдиэлэ түмүктэрэ» түмүктүүр биэриини, «Сахам сирин сарсыардата» сарсыардааҥҥы биэриини, «Местное время. Суббота» информационнай биэриини уонна «Аһаҕас кэпсэтии» тематическай биэриини эпииргэ таһаарар.

Маны таһынан, «Россия 24» телеханаалга күн аайы информационнай таһаарыылар уонна тематическай биэриилэр тахсаллар. «Радио России» араадьыйа ханаалыгар филиал сахалыы уонна нууччалыы тылынан күн аайы 3 чаас эпииргэ тахсар. Үлэ күннэригэр тематическай араадьыйа биэриилэрэ, оттон күн аайы – 6 сонун таһаарыыта тахсар.