Вице-премьер сиэмэх кыыллар ахсааннарын аҕыйатары туруоруста

 Госдуумаҕа экология, айылҕа харыстабылын кэмитиэтин мунньаҕар сиэмэх кыыллар ахсааннарын хонтуруоллуур туһунан кэпсэттилэр. Саха сириттэн мунньахха бырабыыталыстыба бэрэссэдээтэлин солбуйааччы Сергей Местников кытынна.

Кини мунньахха бөрөлөрү, эһэлэри сылы эргиччи хааччаҕа суох бултаһары уонна сылгылары, табалары көмүскүүр туһуттан, бөрөлөрү бултаһарга дьааты туһанары көҥүллүөххэ наада диэн туруоруста.

— Билигин сиэмэх кыыллар таһаарар хоромньулара сөҕүмэр улахан. Саха сиригэр 2017-2024 сылларга аҥаардас бөрөлөртөн 217 сылгыны, эһэлэри аахтахха, барыта 300-тэн тахса сылгыны сүтэрдибит. 2024 сылга бөрөлөр 10 тыһыынчаттан тахса табаны сиэтилэр. Онон уопсай хоромньу 240 мөлүйүөн солкуобайтан тахса буолла, — диэн Сергей Местников кэпсээтэ.

Кулун тутарга буолбут Табаһыттар сийиэстэригэр «бөрө табаны эһэн эрэр» диэн боппуруоһу сытыытык туруорбуттарын санатта. Табаһыттар суһал уонна кытаанах миэрэлэри ыларга туруорсубуттара.

Мунньах кыттыылаахтара сиэмэх кыыллар ахсааннарын хонтуруоллуурга федеральнай бырагыраама оҥоһуллуохтаах диэн идиэйэни өйөөтүлэр. Хас да эрэгийиэн бу маннык кыһалҕаны көрсөр эбит. Онон мунньахха этиллибит көҕүлээһиннэр тустаах министиэристибэлэр, биэдэмистибэлэр көрүүлэригэр ыытыллыахтара.

Ил Дархан, бырабыыталыстыба пресс-сулууспата.