ВИДЕО: 1-кы Хомустаах Дьөгүөрдээннэригэр ураты «Винни-Пух» баар

Бу күннэргэ Сайылык күнүн көрсө Нам улууһун 1-кы Хомустаах уонна Үөдэй нэһилиэктэригэр тиийэн, үлэни-хамнаһы кытта билсэ сырыттыбыт.

1-кы Хомустаахха «Дьөгүөрдээннэринэн» биллэр убайдыы балыс Николай уонна Таисия Колесовтарга «карлик» оҕус баарын көрөн, бэркэ сэргээтибит. Оҕуһу кыратын уонна эмиһин иһин дьиэлээх хаһаайка Таисия Егоровна «Винни-Пух» диэн ааттаабыт. Колесовтарга бастаан кэлэригэр «Олоппос» диэн ааттаах эбит.  Ыанньыксыттар ынах ыыр олоппосторун саҕа уҥуохтааҕыттан итинник ааты биэрбиттэр.

«Аттаммытын кэннэ ылбыппыт. Убайым ньирэйдэри атастаһыыга Уус Алдан улууһуттан ылбыт. Сэмэнтээл сүөһү боруодата эбит. Бу сүөһү аны улааппат дьылҕалааҕын икки сыл буолан баран билбиттэр. Арай оҕустара улааппат да улааппат эбит. Убайым биһиги сэдэх дьиэ сүөһүлэрин иитэрбитин билэн баран, «бэйэҕэр ылан сүөһү гын» диэбитэ. Аны оҕуспут атаҕа маадьаҕар буолан, хаамарыгар эмиэ мэһэйдэтээхтиир. Ийэтэ тыыннаах буолуон сөп. Аҕата идэһэҕэ барбыта ырааттаҕа дии. Онон кырачаан оҕуһум араас сэдэх сүөһүлэрим ахсаанын хаҥата сылдьар«, — диэн кэпсиир хаһаайын Николай Колесов.

Биллэн турар, нууччалыы эттэххэ, араас «аномалия» үгүс.  Дьоҥҥо да карликтар бааллар. Онон «Винни-Пух» курдук да кыра уҥуохтаах сүөһү да, көтөр да баара чахчы. «Оҕуспут атын сүөһүлэри кытта тэҥҥэ мэччийэр. Кинини ким да атаҕастаабат, тэйиппэт», — диэн кэпсиир Таисия Колесова.

Карлик оҕуһу саха учуонайдара болҕомтоҕо ыллылар. Кинилэр көрдөһүүлэринэн олохтоох бэтэринээр Айсен Ядреев чинчийиигэ анаан Винни-Пух» хаанын ылла. Онон сотору кэминэн туох эмэ сонуну истиэхпит. Сотору кэминэн оҕусчаан киин куорат «Үрдэл» пааркатын дьоҕус зоопаркатыгар «харчы өлөрө» туһалаах дьыаланы оҥоро барыахтаах. Онуоха диэри Винни-Пух» күүс-уох ылар, этэҥҥэ күөххэ үктэммиччэ, мэччирэҥҥэ дуоһуйа сылдьар.