ВИДЕО: -51 кыраадыс тымныыга лыах тилиннэ

Өлүөхүмэ улууһун I Нөөрүктээйи нэһилиэгэр кыс ортото, Саҥа дьылы көрсө лыах тиллибит диэни истээт, хаһаайка нүөмэрин булан төлөпүөнүнэн сибээстэһэ сырыттыбыт. Чахчы эбит.

Бүгүн I Нөөрүктээйи нэһилиэгин олохтооҕо, уһуйаан исписэлииһэ, дьиэлэригэр лыах тиллибит Александра Николаевна Миронова:

— Дьиҥэр, ити лыах тиллибитэ ый курдук буолан эрэр, видеоҕа хойут устубутум. Быйыл саҥа дьиэ туттан киирдибит, хойукка диэри оҥоһуннубут. Баҕар ол кэмҥэ киирэн хаалан баран муоста анныттан тахсыбыта буолуо диэн сабаҕалыыбыт.

Түннүккэ олорон уу иһэр быһыылаах. Кэлин илиибэр олорор буолбутугар ууга мүөт суурайан биэрбиппин олус үчүгэйдик испитэ, бэҕэһээ эмиэ оннук аһаабыта. Остуолга эҥин олордоҕуна ууран биэрэбит, санаатаҕына бэйэтэ кэлэн иһэр. Күнүс биллибэт буолан хаалар. Баҕар, үлэбитигэр сылдьар буолан бэлиэтии көрбөппүт эбитэ дуу. Киэһэтин өрө-таҥнары көт да көт буолар.

Бүгүн биһиэхэ -51 кыраадыс тымныы, дьиэ иһигэр 20-тэн тахса кыраадыс. Дьиҥэр, билигин утуйар кэмэ эбээт, тугу гынарбыт буолла. Сайыҥҥа диэри тулуйуо суоҕа дии саныыбын. Анал үөрэхтээх дьон сүбэ-ама биэрдэллэр бэрт этэ эрээри, билиҥҥитэ сибээскэ тахса иликпит — диэн кэпсиир.