ВИДЕО: Аҕыс саастаах оһуохайдьыт оҕо

Бу күннэргэ ыһыах түһүлгэтигэр киирэн бэрт үөрүйэхтик оһуохай таһаара сылдьар оҕо видеота социальнай ситиминэргэ киэҥник тарҕанна, элбэх киһи сэҥээрдэ. Ыйыталаһан ханнык улуус оҕото буоларын биллибит. Муус устартан эрэ дьарыктаммыт эбит уонна ити курдук сатабыллаахтык этэр.

Саха дьонун кутун туппут оһуохайы таһаарар кырачаан уол Үөһээ Бүлүү улууһун Ю.Н.Прокопьев аатынан оҕо успуордун оскуолатын 2-с кылааһын үөрэнээччитэ Харысхан Руфов эбит.

Харысханы оһуохайга уһуйар салайааччыта Ульяна Тюкянова бу курдук кэпсиир:

— Социальнай ситиминэн Харысхан Өргүөт нэһилиэгин быйылгы ыһыаҕар таһаарбыт оһуохайа тарҕанна. Мин тустаах оскуолаҕа олунньуттан фольклорга үөрэҕи таһынан эбии дьарыгы ыытан саҕалаатым. Харысхан миэхэ төрөппүттэрин, учууталларын эҥин ыйыытынан-кэрдиитинэн буолбакка, оһуохайга үөрэтэрбин истэн, эйиэхэ дьарыктанабын дуо диэн бэйэтин баҕатынан муус устартан дьарыктанар. Үөрэҕэр туйгун. Бу иннинэ хоһоон ааҕар эбит уонна буоксанан дьарыктанар.

Бэс ыйыгар Үөһээ Бүлүү улууһун Н.И.Бойлохов аатынан оҕо ускуустубатын оскуолатыгар ыһыахха аналлаах лааҕыр үлэлээтэ. Оскуолаҕа уонтан тахса оҕо дьарыктанарыттан лааҕырга алта оҕо сырытта (Руфов Харысхан 2 кылаас, Архипова Алисия 1 кылаас, Тобохова Алдаана 1 кылаас, Афанасьева Влада 6 кылаас, Павлова Асель 3 кылаас,  Саввинова Сайыына 3 кылаас). Бэйэм көрүүбүнэн иитэн-үөрэтэн таһаараары билиҥҥитэ кыра кылаастары эрчийэбин.

Лааҕырга киирэн Харысхан өссө күүскэ дьарыктанна. Быыс булларбыт эрэ оһуохайдаатыбыт уонна улуус иһинээҕи ыһыахтарга кытынныбыт. Кини оһуохайы бэрт түргэнник ылынар уонна кылгас кэм иһигэр арылынна. Ким да эппэтэҕин үрдүнэн ис сүрэҕиттэн оһуохайдыы сылдьар. Биир да түһүлгэни көтүппэт, кырдьаҕас да буоллун, эдэр даҕаны буоллун барытыгар киирэр, – диэн уһуйааччыта кэпсиир.

Үс эрэ ый үөрэммит 8 саастаах оһуохайдьыт оҕо Харысхан Руфов бэҕэһээ ыытыллыбыт Үөһээ Бүлүү ыһыаҕар күөн күрэскэ кыттан I үрдэли ылбыт. Ол иннинэ Улуу кыайыы 80 сылыгар аналлаах Өргүөт нэһилиэгин ыһыаҕар сэрии бэтэрээнэ Иванов Артамон Спирдонович аатынан 30 тыһ. солк. суумалаах анал бирииһи тутар дьолун билбит. Үөдүгэй, Хоро нэһилиэктэрин ыһыахтарыгар тахсан оһуохайдаан бастаан, сыаналаах бириистэринэн наҕараадаламмыт. Ити курдук Харысхан кылгас кэм иһигэр ситиһиитэ үгүс. Саха төрүт үгэһин иҥэринэ сылдьар айылҕаттан талааннаах оһуохайдьыт оҕоҕо өссө үрдүк үктэллэри баҕарабыт!