ВИДЕО: Алдаҥҥа кыбартыыраттан кырбаммыт уол оҕону буллулар

Сэтинньи 16 күнүгэр Алдан куоратын Молодежнай уулуссатыгар турар элбэх кыбартыыралаах дьиэтин олохтооҕо ыаллыы олорор кыбартыыраларыттан оҕо ытыырын уонна тыас-уус иһиллэрин туһунан ИДьМ-ҥа иһитиннэрбит.

Ыйыллыбыт аадырыска Алдан оройуоннааҕы ИДьМ полиция отделын участковайа тиийбит. Кыбартыыраҕа ийэлэрин уонна кини дьукааҕын кыттан икки кыра оҕо баар эбит: алта саастаах уол уонна биир саастаах кыыс. Полицейскай уол оҕо этэ-сиинэ кырбаммытын бэлиэтээбит. Оҕо эппитинэн, кинини ийэтэ саайбыт.

Ол күн оҕолору балыыһаҕа илдьибиттэр. Уолчаан алта сааһыгар 98 см үрдүктээх уонна 13 киилэ ыйааһыннаах эбит.

Бэрэбиэркэ саҕаламмыт, матырыйааллар силиэстийэлиир уоргаҥҥа тиэрдиллиэхтэрэ.